Qinikkat atorfilittallu Qaqortumi naapissapput

Naalakkersuinikkut Ataqatigiissaarisoqatigiit, tassa Naalakkersuisunut ilaasortat borgmesterillu Qaqortumi sap. ak una naapissapput.

Ataatsimiinnermut qaaqqusisoq, Isumaginninnermut, Suliffeqarnermut, Nunamullu Namminermut Naalakkersuisoq isumalluarpoq.

- Isumaginninnermi suliassaqarfimmi unammilligassaqaqaluta nalunngilarput. Taamaattumik sammisaq pillugu oqallinnissamut qilanaarpunga. Pissarsinassaqaaq, oqallisaasut unammilligassat suliarinerinut atussavagut, Jess Svane oqarpoq.

Sammisami tassani Nunatsinni Perorsaasut Kattuffianit, SIK-mit Inunnillu isumaginninnermi siunnersortit ilinniarsimasut peqatigiiffiannit aamma saqqummiisoqassaaq.

Sammisap saniatigut politikkikkut suliassat allat aamma oqallisaassapput.

Jess Svanep naapitassani qilanaarai.

- Politikkikkut suleqatima naapinnissaat pingaarutilinnillu oqalliseqatiginissaat pissarsinassaqaaq. Oqallisissagut nunatta aqunneqarneranut pingaarutilerujussuupput. Ullormi immikkut sammisaqarfissami saqqummiisussat saqqummiussassaat tusassallugit aamma qilanaarnarput. Ulapputissaqarpugut, suliassagullu suliarissavagut, Jess Svane oqarpoq.

Naalakkersuinikkut Ataqatigiissaarisoqatigiit ukiumut marloriarlutik naapittarput. Tassani Naalakkersuisut kommunillu akisussaaffiinut tunngasut oqaluuserineqartarput.