AtuartigukKalaallit Nunaata inuussutissarsiornikkut takornariaqarnikkullu ineriartornera Danmarkip tapersersorpaa
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Nunanut Allanut, Inuussutissarsiornermut, Niuernermullu Naalakkersuisoq Vivian Motzfeldt ippassaq Danskit Inuussutissarsiornermut Ministeriat Morten Bødskov Nuummi ataatsimeeqatigaa.
Inuussutissarsiornermut Ministeri Morten Bødskov ippassaq ullumilu Kalaallit Nunaanniippoq, tikeraarnermini Vivian Motzfeldt ataatsimeeqatigigaa, nunattalu inuussutissarsiornikkut, takornariaqarnikkullu pilersaarutai tusarusutaanut ilaapput.
Danskit Naalakkersuisuisa nunatsinni attaveqaasersuinermut annikitsunut ineriartortitsinissamut ukiuni 2023-imit 2026-imut atugassatut 9,5 mio. kr. immikkoortippaat. Aningaasaliissutinit talittarfiit puttasut, pisuffissiat assigisaallu Kalaallit Nunaanni takornariaqarnermut pisariillisaataasinnaasut pitsanngorsarnissaannut atugassiissutaapput, nunatsinni silap pissusaanit attaveqaasersuutit sunnertiasut tassani pineqarlutik. Aningaasaliissutit Naalakkersuisunut tunniunneqassapput, Naalakkersuisullu namminneerlutik aalajangissavaat aningaasaliissutit qanoq iluaqutaanerpaamik atorneqassanersut.
”Takornariartutut avannamut takornariarniaraanni Kalaallit Nunaata iluliarsui aammalu kulturi kialaartumik tikilluaqquserpasittoq misigisassat ilaannamininnguaraat. Inuppassuuppullu takornariartartut. Takornariaqarnikkut ineriartorneq pilersarpoq, kalaallillu naalakkersuisuisa kalaallillu inuiaqatigiit takornariaqarnermik ineriartortitsinerat isigalugu isumassarsiorfitsialaavoq, siunissamullu takornarissat suli amerlanerusut tikittalernissaannut aqqutissiuussisuulluni,” taama oqarpoq inuussutissarsiornermut ministeri Morten Bødskov.
”Ukiuni makkunani nunatsinni takornariaqarneq annertuumik ineriartorpoq. Takornariartitsinermut sinaakkutit nalimmassarniarlugit sulinerput maanna ingerlapparput. Tikeraartutta pitsaasumik misigisaqarnissaat, taamaattorli ilutigalugu sumiiffinni innuttasut inuussutissarsiutillu ataavartut akornusersorneqannginnissaat, ilutigalugulu nunaqavissut takornariartitsinermi suliffeqarfii pitsaanerpaamik aningaasarsiornissaannut tapersersornissaat pisariaqartinneqarpoq. Aningaasaqarnikkut immitsinnut napatilernissatsinnut takornariaqarnerup ineriartortinnissaa tunngaviusumik pingaaruteqarpoq.” Taama oqarpoq Nunanut Allanut, Inuussutissarsiornermut, Niuernermullu Naalakkersuisoq, Vivian Motzfeldt.
Namminersornermut inatsit aallaavigalugu periarfissaq aallaavigalugu siunissami suliffeqarfiit-, naatsorsuuserinermut kukkunersiuinermullu akisussaaffiup tigunissaanut ingerlaasissaq pillugu Vivian Motzfeldt aamma Morten Bødskov eqqartuipput.
”Akisussaaffinnik tigusinissat unammillernartortaqassasut nalunngilarput, taamaattumillu peqqissaarullugit piffissarlu atortariaqagarput tamaat atorlugu piareersarluarnissaq pisariaqarpoq. Inuussutissarsiornerup ineriartortinnissaanut nammineq kalaallit ingerlataannit ineriartornerup tamanna ilagiinnarpaa, sinaakkutit Kalaallit Nunaannut naleqqussakkat aningaasaqarnerullu imminut napatittup ineriartortinnissaannut pisariaqartuullutik. Namminersorlutik Oqartussaanermi tamakkiisumik ineriartornermut ilaaginnarpoq, tassanilu soorunami Namminersorluni Oqartussaanermi inatsisip taassumalu sinaakkusiussai aallaavigalugit ingerlanneqassapput.”, taama oqarpoq Nunanut Allanut, Inuussutissarsiornermut, Niuernermullu Naalakkersuisoq Vivian Motzfeldt.
Attaveqarfissaq: Naalakkersuisumut allatsi Naasunnguaq Beck Kristensen, Email: nabk@nanoq.gl, Mobil: +299 533684