Naalakkersuisup Kanunupe aamma MIO taperserpai

Kanunupe, Kalaallit Nunaanni Nunaqarfiit Peqatigiiffiat Meeqqallu Illersuisoqarfiat, MIO meeqqanut inuusuttunullu kinguaassiutitigut atornerluisarneq pinaveersaartinniarlugu suleqatigiinnissamik isumaqatigiissuteqarput. Meeqqanut, Inuusuttunut Ilaqutariinnullu Naalakkersuisoq, Aqqaluaq B. Egede suleqatigiinneq nutaaq taperserpaa.

Kanunupe Mio-llu meeqqanut inuusuttunullu kinguaassiutitigut atornerluisarneq pillugu suliniutaat, nunaqarfinni kinguaassiutitigut atornerluisarnernik ukkatarinninnerusussat Naalakkersuisut tapersersorpaat.

-Nunaqarfinni meeqqat inuusuttullu tusaaneqarnerusariaqarput, taamaattumik nunaqarfinni meeqqanut kinguaassiutitigut atornerluisarneq akiorniarlugu suliniutinik aallartitsinissamut Kanunupe MIO-llu akornanni suleqatigiinneq taperserpara, Aqqaluaq B. Egede taama oqaaseqarpoq.

Ullumikkut kinguaassiutitigut atornerlugaasimasut ’Tusaannga’-mut 1899-mut sms-erlutik imaluunniit oqarasuaammut 801180-mut sianerlutik saaffiginnissinnaapput. Saaffiginnissinnaaneq pillugu Naalakkersuisoq meeqqanut inuusuttunullu toqqaannartumik oqariartuuteqarpoq.

-Kinguaassiutitigut kanngutsaatsuliorfigineqarsimaguit misigalutillu oqaloqatissaqarnak ’Tusaannga’-mut saaffiginnissinnaavutit. Akeqanngitsumik 1899-mut allannikkut allaqatiginnissinnaavutit.

Tassuuna qanoq iliorsinnaanissannut ikiorneqassaatit, Aqqaluaq B. Egede taama oqarpoq.

Kanunupe aamma Mio paasititsiniaassapput, paasisitsiniianissaq Naalakkersuisut aningaasatigut aamma taperserpaat.

Sukumiinerusumik paasisaqarusukkaanni Naalakkersuisup allattaa Rosa Thorsen. 553303, rose@nanoq.gl attavigiuk