Siulersuisuni piginnaasat nutaat – Royal Greenlandimi immikkut ittumik ataatsimeersuarneq

Septembarip 14-iani Royal Greenlandimi immikkut ittumik ataatsimeersuartoqassaaq.

2023-mi maajip 9-ani nalinginnaasumik ataatsimeersuarnermi nalunaarutigineqartutut, Niels Thomsen siulersuisuni ilaasortassatut qinerneqassaaq. Aalisakkerivimmi Halibut Greenlandimi 2011-mit 2020 tikillugu pisortaanertut atorfeqarsimanermigut, inuussutissarsiummi ilaatigut misilittagaqarpoq. Taassumap saniatigut 2020-miilli Kalaallit Airports Holdingimi siulittaasup tulliattut inissisimavoq, soorluttaaq 2013-imit 2018 tikillugu KNI-mi siulittaasuunikuusoq. Niels Thomsen aalisakkerivimmi Halibut Greenland A/S-imi kiisalu North Atlantic Seafood A/S-imi atorfeqarsimanermigut, ingerlatat aallartinnerinit naammassinissaasa tungaannut naleqassusiinut ilisimasaqarluarpoq.

Taassumap saniatigut Preben Sunkep, nunat tamalaat akornanni inuussutissanik suliffissuaqarnerup iluani misilittagaqarlunilu aningaasaqarnermut tunngatillugu piginnaasaqarluartup Royal Greenlandip siulersuisuini ilaasortaaneratigut, siulersuisut nukittuumik inissisimassapput. Preben aningaasaqarnermut pisortaanertut misilittagaqarpoq, ukiunilu 30-ni Danish Crownimi atorfeqarsimanermigut inuussutissanik suliffissuaqarnerup iluani, ilaatigullu Nykreditip aamma Forenet Kreditip siulersuisuini ilaasortaasimanermigut aningaasaqarnermut tunngatillugu naleqquttumik ilisimasaqarluni.

Ingerlatseqatigiiffiup nalinginnaasumik ataatsimeersuarnerani Naalakkersuisut oqariartuutigaat, ingerlatseqatigiiffiup Kalaallit Nunaat aallaavigigaa, suliffeqarfillu maaniilluni inuiaqatigiit suliaqarfigisani paasisimasaqarfigisariaqarai. Naalakkersuisut maluginiarpaat, tulliuttut qitiutillugit Royal Greenland pilersaarummik saqqummiussaqartoq:

• Royal Greenland Nuummi nutaamik qullersaqarfiliorniarnini ingerlallualereersimagaa.
• Royal Greenlandimi pisortat Kalaallit Nunaanniinnissaat siunertaralugu, pisortaanerit nutaamik aaqqissuussiffiginissaat sulissutigineqartoq.
• Royal Greenlandip nunatsini sulisumi, siunissamilu pisortanngortussanik piginnaanngorsaaqqiinermik suliaqarnini annertusarniaraa.

Siuliani pilersaarutit piviusunngortinneqarnissaat Royal Greenlandip suli siunnerfigigaa, Naalakkersuisut ersarissumik paasillulugu naatsorsuutigaat.

Siulersuisuni ilaasortanngortut Naalakkersuisut tikilluaqquaat, piginnittullu piumasaqaataasa piviusunngortinneqarnissaannut ingerlatseqatigiiffik sulilluarnissaanik kissaallugu.

Ataatsimeersuarneq ingerlanneqareerpat imaqarniliaq nassiunneqartussanngorlugu piginnittunik aggersaanertaqanngitsumik ataatsimeersuarneq ingerlanneqassaaq.

Annertunerusumik paasisaqarusukkuit Naalakkersuisut Siulittaasuata Naalakkersuisoqarfia govsec@nanoq.gl-imut attavigiuk.