Aalisarnermut Piniarnermullu Naalakkersuisup Danmarkimi Inuussutissalerinermut, Nunalerinermut aamma aalisarnermut ministeriat ataatsimeeqatigissavaa

Aalisarnermut Piniarnermullu Naalakkersuisup Karl Tobiassenip danskit Inuussutissalerinermut, Nunalerinermut Aalisarnermullu Ministeriat Jakob Jensen Aalisarnermut Piniarnermullu Naalakkersuisoqarfiup ataatsimiittarfiisa ilaanni ullumi septembarip 5-ianni 2023-mi ataatsimeeqatigissavaa.

Ataatsimiinnermi oqaluuserineqartussat ilaatigut tassaapput:
Aalisarnermut tunngasut nalinginnaasut, nunami aalisarnermut isumalioqatigiissitat, uumasunut nakorsaqarnermut inuussutissalerinermullu tunngasut akisussaaffigineqalernissaat, aalisakkanit qajuusaasianik uuliaallu tunisassiorneq siunertaralugu Kalaallit Nunaanni nerukkaatit pillugit inatsisit aamma qarasaasiakkut nakorsiartitsisarneq (telemedicin).

Danmarkimi ministerip sisamanngornermut septembarip 7-iannut nunatsinniinnermini ilaatigut pulaagassai tassaapput: Kilisaat Sisimiut, Polar Raajat, Pinngortitaleriffik, KANUAANA, Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik, RG-ip qullersaqarfia kiisalu, Issittumi Sakkutooqarfik.
Paasissutissat pillugit saaffigisassaq: Aalisarnermut Piniarnermut Naalakkersuisoqarfik. APN@nanoq.gl