Naalakkersuisut Qeqqata Kommunia suleqatigalugu matumuuna qaaqqusipput

Soqutiginnittut innuttaasut aamma suliffeqarfiit matumuuna kajumissaarneqarput akuersissummik imaluunniit akuersissutinik qinnuteqaateqarsinnaanermik, Qeqqata Kommuniani akiliuteqarluni aalisartitsisarnermut kisermaassilluni ingerlatsisinnaanermut akuersissummik, sumiiffinni aalajangersimasuni assigiinngitsuni ingerlanneqarsinnaasunik.

Qeqqata Kommuniata nunaminertat arlaqartut akiliuteqarluni aalisartitsisarnermut akuersissuteqarfiusinnaasutut kommunimut pilersaarummut ilassummi nr. 27-imi inississimavai.

Neqeroortitsinermi matumani qinnuteqaatit Nunanut Allanut, Inuussutissarsiornermut Niuernermullu Naalakkersuisoqarfimmi tiguneqareersimassapput kingusinnerpaamik marlunngorneq 31. oktober 2023 nalunaaqutaq 23.59 Nuummi, Kalaallit Nunaanni nalunaaqutaq malillugu.

Sumiiffiit akuersissuteqarfiusinnaasut isigineqassapput takornariartitsinermik suliassaqarfimmut atatillugu Naalakkersuisut periusissiaanni ilaasutut, siunertaqartumik nunatsinni takornariartitsisarnermik inuussutissarsiornermi namminersortut aningaasalersuinerisa annertusaaviginissaanik, taamalu aningaasarsiornikkut siuariartortitsinerup suliffissaqartitsinerullu annertusarneqarnissaannik.

Qinnuteqarnissamut qaaqqusissutitut allakkiaq akuersissuteqartarnermilu atortut allat piumasaqaataasut tamaasa ilanngullugit, malittarisassat aamma atugassarititaasut, aamma ilaallutik skema qinnuteqarfissaq qinnuteqarnermullu ilitsersuut tigoriaannaapput uani: udbud.gl

Qaaqqusissutitut allakkiamut, tassungalu ilanngussat pillugit apeqqutigiumasat ingerlatinneqassapput uunga: Nunanut Allanut, Inuussutissarsiornermut, Niuernermullu Naalakkersuisoqarfik, e-mailimi uani: nainn@nanoq.gl