Upernavimmi innuttaasut peqqinnissaqarfik ukkataraat

Peqqissutsimut Naalakkersuisup Mimi Karlsenip Avannaani piffinnut assigiinngitsunut angalanini arfininngorneq aggustip 19-iat 2023 Upernavimmi innuttaasunik ataatsimiitsitsinermik naggaserpaa.

Mimi Karlsen oqarpoq:
"Innuttaasunik ataatsimiitsitsineq peqataaffigineqarluarpoq. Upernavimmi eqqaanilu innuttaasut peqqinnissaqarfimmut kiisalu sullissinerup pitsaassusianut soqutiginninnerat malunnarluarpoq. Sulisussarsiortarnermik unammilligassat aamma napparsimasunik katsorsaanerit ataqatigiinnginnerat innuttaasunik ataatsimiitsitsinermi initungaatsiarput. Qarasaasiakkut nakorsiartitsissummik atuineruneq, sukkanerusumik pisariinnerusumillu kræftimik qulaajaasarnissamik kissaateqarneq, kiisalu peqqinnissaqarfiup aaqqissuussaanera ataatsimut isigalugu ilaatigut aamma eqqartorneqartut ilagaat.”

Nangipporlu...
”Tamatuma saniatigut nunaqarfik Aappilattoq takuara, taamaasillungalu KANUNUPE-p siulittaasua Karl Petersenip naapinnissaanut periarfissaqarsimallunga. Sumiiffik nammineq isinnik takullugulu suliniutit suut aallartinneqarsimanersut uannut tusartinneqarput.”

Naalakkersuisup Upernavimmiinnera ilutigalugu utoqqaat illuat kiisalu Peqqissaavik pulaarpai, tassani peqqissutsikkut sullissisut unammillernartunik pitsaanerulersitsinissamullu periarfissanik misigisaminnik oqaluttuarnerannut Mimi Karlsen tusarnaarpoq.

Paasisaqarnerorusukkuit Naalakkersuisup allattaa Naja Lynge Petersen e-mail: nalp@nanoq.gl imaluunniit oqarasuaammut uunga +299 34 66 41