AtuartigukKapisilinniat Innuttaasunik peqataatitsinissamik pilersaarummut peqataasut aningaasanik akissarsiassaqartinneqarput
Nassiussisuuvoq: Aalisarnermut Piniarnermullu Naalakkersuisoqarfik
Atlantic Salmon Federation-ip (ASF-ip) aamma The Norths Atlantic Salmon Fund-ip (NASF-ip) akissarsiarititaanik eqquisinnaavutit. Peqataaniaruit kapisilinniarnissamut akuersissummik pissarsissaatit pisatillu piffissaliussap qaangiutinnginnerani nalunaarutigalugit, kiisalu kapisilittannit misissugassatut tigusatit Pinngortitaleriffimmut nassiullugit.
Kapisillit Kalaallit Nunaanni pisarineqartartut Atlantikup avannaani, Amerikami avannarlermi Europamilu sumiiffinnit assigiinngitsorpassuarneersuusarput. Pinngortitaleriffiup ilaatigut nunani tamalaani ilisimatusartut suleqatigalugit kapisillit suminngaanneersuunersut misissortarpai. Kapisilittannit misissugassatut tigusavit nassiuttarnerisigut Kalaallit Nunaanni kapisillit pillugit ilisimasanik ilisimatusartut katersinerannut ikiuussinnaavutit.
Innuttaasunik peqataatitsinissamik pilersaarummut peqataaniaruit ulloq sumiiffillu kapisilimmik pisaqarfigisat, pisavit oqimaassusaa takissusaalu pillugit paasissutissat, tattaanit misissugassatut tigusat, ipiutaasartaanit misissugassatut tigusat sumullu attavigineqarsinnaanersutit pillugit paasissutissat nassiutissavatit.
Misissugassatut tigusat uunga nassiunneqassapput:
Pinngortitaleriffik
P.O. Box 570
3900 Nuuk
Kapisiliup tattaanit ipiutaasartaanillu misissugassatut tiguneqartut Pinngortitaleriffimmut nassiunneqassapput.
Kapisilinniarsinnaanermut akuersissummik pigisaqartut tamarmik misissugassanik nassiussisimasut aamma pisaminnik KANUAANA-mut nalunaaruteqarsimasut akornanni aningaasanik eqqugassartalinnik makitsisoqassaaq. Kapisilinniarnissamut akuersissutinnut ilanngussami paasisaqarnerusinnaavutit.