Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

  4. Del link
🔈 Atuartiguk

Innuttaasut 8.261-isut amerlatigisut pisortaqarfinnit aningaasarsinngitsoorsinnaasut

Nassiussisuuvoq: Naalakkersuisut Siulittaasuata Naalakkersuisoqarfia

Aggustip 12-iat 2023 pisortaqarfinnit aningaasat tunniunneqartussanut tamanut NemKonto-systemi Atulissaaq. Innuttaasut 18-init sinnerlugit ukiullit 8.261-isut amerlatigisut suli NemKontomik nalunaarsuisimanngillat. NemKontomik nalunaarsuisitsisoqarsimanngippat, taava pisortaqarfiit aggustip 12-iata kingorna nalunaarsuisimanngitsunut aningaasanik tunniussisinnaanngillat.

Akiliutissat suut pineqarpat?
Innuttaasut NemKontomik nalunaarsuisimanngitsut 8.261-isut ilagaatit? Taava aggustip 12-iata kingorna pisortaqarfinnit aningaasanik pissarsisinnaajunnaassaatit.

Tulliuttut pissarsiarisinnaajunnaassavatit:

  • Akissarsiat
  • Soraarnermusiassat
  • Ilinniarnermusiassat
  • Ineqarnermut tapiissutit
  • Akileraartarnermut Aqutsisoqarfimmit aggusti naalerpat utertoorutissat
  • Isumaginninnermit ikiorsiissutit allat

”Innuttaasut tamakkerlutik NemKontomik nalunaarsuisimanissaat pingaaruteqartorujussuuvoq, taamaattoqanngippat akissarsinngitsoortoqarsinnaavoq, taamaattoqassappallu ineqarnermut akiliutissat allallu pissarsiarineqarsinnaajunnaassapput. Piffissaq sivitsortoq nalunaaruteqartarsimavugut, innuttaasullu 81 %-iisa oqaatigineqartoq tusarlugu NemKontoqalersimapput. Uanili pingaaruteqarpoq innuttaasut 19 %-ii kingulliit aggustip 12-iat tikitsinnagu aamma pisaarnissaat” Digitalinngortitsinermut Aqutsisoqarfimmi pisortaaneq, Katrine H. Nathanielsen, taama oqarpoq.

NemKontoqalernissamut piumasaqaatit pillugit tulliuttut nalunaaruteqarnermi atorneqarsimapput:

  • Digitalimik allakkat atorlugit innuttaasut NemKonto-mik nalunaaruteqarsimanngitsut juuni naalersoq allagarsipput
  • Attaveqaatit nittartakkatigoortut, KNR Radio aamma TV kiisalu inuit attaveqaataat
  • Namminersorlutik Oqartussat kommuunillu akissarsianut allagartaanni kajumissaarummik aamma allassimasoqarpoq
  • Kommunit ilaat utoqqaat illuannukarlutik utoqqaat NemKontomik nalunaaruteqarnissaannik ikiorsimavaat
  • Kommuninut, kigutileriffinnut, peqqissaavinnut, politeeqarfinnut, innuttaasunut sullissivinnut, KNIPK-mut, NIIK-mut, Sugisaq-mut, Tilioq-mut, utoqqaat illersuisuannut, utoqqaat illuannut ilinniarfeqarfinnullu plakaatinik nassiussisoqarnikuuvoq 
  • Aningaaseriviit atuisuminnut piumasaqaatit pillugit eqqaasitsinikuupput

NemKontomik nalunaarsuineq pisariitsuaraavoq
Aningaaseriviit aqqutigalugit NemKontomik nalunaarsuinissaq pisariitsuaraavoq. Internetbrowswer atorlugu Netbankinnut iserlutit kontorisat sorleq NemKontotut atorniarnerlugu nalunaarsussavat.

Aningaaserivinnit ikiorneqarsinnaavutit. 

Aamma piumaguit nemkonto.dk aqqutigalugu NemKontomik nalunaarsuisinnaavutit. Isernissannut MitID atortariaqarpat, tassanilu kontorisat sorleq NemKontotut atorniarnerlugu nalunaarsussavat. Uanili maluginiassavat, atuutsitsilernissannut allakkiamik pissarsinissat utaqqeqqaartariaqarakku, taannalu pissarsiarereerukku aatsaat NemKonto atuutsilersinnaallugu.

Kontorisat qanoq NemKontotut nalunaarsussanerlugu paasisaqarnerorusukkuit, soorlu NemKontoqartariaqarnerlutit paasiniarlugu sullissivik.gl iserfigiuk:

DA: https://www.sullissivik.gl/Emner/B_NemKonto/NemKonto?sc_lang=da-DK

KAL: https://www.sullissivik.gl/Emner/B_NemKonto/NemKonto?sc_lang=kl-GL

Paasissutissat

  • Juulip naalernerani innuttaasut (18-ileereernikut) 8.261-isut suli NemKontossaminnik nalunaarsuisimanngillat.
  • Kommuninit akissarsineq siulleq aggustip 18-iat pissaaq
  • Namminersorlutik oqartussanit akissarsineq siulleq aggustip 25-at pissaaq
  • Aggustip 31-anni kommunini Namminersorlutillu Oqartussaqarfinni sulisut qaammammusinissaat siulleq pissaaq
  • Aggusti naalerpat Akileraartarnermut Aqutsisoqarfimmit utertoorutissat tunniunneqassapput
  • NemKonto atorlugu innuttaasut oqilisaanniarneqarput, pisortaqarfinnummi kontonormu nalunaarutigisaqattaarneqartariaarutissaaq
  • NemKonto atorlugu pisortaqarfiit aningaasanik tunniussinissaat pisariinnerulissaaq, tassami innuttaasut inuttut normui takuinnarlugit akiliisinnaalissagamik
  • Pisortaqarfinnit kontunniittuutit takuneqarsinnaassanngillat, aningaasanik tigusisinnaassanngillat, aningaasanillu atuisimanerit takuneqarsinnaassanani 
  • Qitiusumik Suliffeqarfinnik Nalunaarsuiffimmi nalunaarsuisarneq pillugu Inatsisartut inatsisaat imaluunniit Qitiusumik Suliffeqarfinnik Nalunaarsuiffiit pillugit inatsit naapertorlugu CVR-normumik tunineqarsimasunut tamanut NemKonto pillugu inatsit suliffeqarfinnut CVR-ilinnut aamma atuuppoq.
     

Paasisaqarnerorusukkaani saaffissaq
Katrine Hjelholt Nathanielsen, Aqutsisoqarfimmi pisortaaneq
34 59 70 / kat@nanoq.gl