KNI A/S aningaasatigut angusarissaartoq

Ingerlatseqatigiiffik KNI ukioq naatsorsuusiorfiusoq kingulleq immikkut ittumik aningaasatigut angusarissaarluarpoq. Namminersorlutik Oqartussat ingerlatseqatigiiffik pigisaat akileraannginnermi 239 millionik koruuninik sinneqartoorpoq. Tamanna ingerlatseqatigiiffiup sisamanngornermi ataatsimeersuarnerani saqqummiunneqarpoq.

KNI A/S takornariartaatinut ikummatissanik tunisaqarnermigut immikkut ittumik isertitaqarpoq, taamaalilluni Polaroil sinneqartoornermik pilersitsisuuvoq.
- Ukiumi naatsorsuusiorfiusumi qaangiuttumi KNI-p annertuumik sinneqartoornera ilaatigut takornariartaatileqatigiinnut ikummatissanik tunisinermit aallaaveqarpoq tamannalu inuaqatigiinnut toqqaannartumik iluaqutissanngortinnissaat siunniuppaat, Múte Bourup Egede oqarpoq.

Taamaattumik Nalakkersuisut Siulittaasuata KNI-mi sulisut aningaasatigut angusarissaatitsisimanerat naammagisimaarpaa nuannaarutigalugulu.
KNI A/S Kalaallit Nunaanni niuernermik pilersuinermillu suliffeqarfiit annersaraat. Suliffeqarfissuaq KNI sisamanik niuerfeqarpoq; Polaroil, Pilersuisoq, KNI engros aamma Neqi A/S.
Naalakkersuisut Siulittaasuata KNI-p siulersuisui, pisortaqarfia sulisuilu tamarmik ukiuni tulliuttuni sulilluarnissaannik kissaappai.