Sinerissap qanittuani aalisarluartoqarpoq - Qeqertarsuup Tunuani aalisarnerup ingerlatiinnarnissaa qulakkeerneqarpoq

Aqutsiveqarfimmi Qeqertarsuup Tunuani umiatsiaarasorlutik aalisartut sapaatip akunnerini kingullerni aalisarluartorujussuupput, qaleralillit 326 tonsit qaqinneqareerlutik. Taamaalilluni kvartalit pingajuannut qaleralittassiissutigineqartut, kvartalip ullui aallartiinnartut, ulluisa 14-issaanni tamakkerlugit aalisarneqariissangatinneqarlutik.

Taamaattumik Aalisarnermut Piniarnermullu Naalakkersuisup kvartalit pingajuannut pisassiissutit juulip 20-anni 2023-mi nalimmassarpai, kvartalit sisamassaannit aamma aqutsiveqarfik Uummannamit nuussilluni. Taamaalilluni Qeqertarsuup Tunuata aqutsiveqarfiani aalisarneq unigani sapaatip akunnerini tulliuttuni ingerlaannassaaq.

Namminersorlutik Oqartussat nalunaarutaat nr. 47, 18. december 2020-meersoq naapertorlugu Naalakkersuisut aalisariutinit 2022-mi pisarinngitsuukkanik umiatsiaararsortunut nuussisinnaapput.

Naatsorsuutigineqarpoq 2023-mi aggustip aallartissimalerneranit pisarinngitsuukkat nuunneqarsinnaassasut, pisanut nalunaarsuinerit aamma tulaanneqarsimasut naatsorsorluarneqareeriarpata. Pisarinngitsoorneqarsimasut aqutsiveqarfinnut assigiinngitsunut umiatsiaararsortunut agguaanneqarlutik pisassanngortinneqassapput. 2022-mi pisarinngitsuukkat 3.000 tonsit missaanniittut umiatsiaaqqanut pisassanngortinneqarput.

Qeqertarsuup Tunuanut kvartalip pingajuannut pisassiissutit immikkut 724 tonsinik nalimmassaavigineqarput, taamaalilluni aqutsiveqarfimmi aalisarneq tunitsivinnilu suliffissaqartitsineq qulakkeerneqassaaq.

Qaammatinut pingasunut, kvartalinut, pisassiissutit aamma aalisarneqarsimasut nalunaarsorneqarneri uani www.GFLK.gl-mi atuarneqarsinnaapput malinnaavigineqarlutillu.

Paasisaqarnerorusukkuit Aalisarnermut Piniarnermullu Naalakkersuisoqarfik apn@nanoq.gl attavigalugu saaffigiuk.