Qaqqat qajannartortallit alapernaarsorneqarnerat pillugu ilisimatitsineq mianersornissamillu kaammattuineq

Ujarassiuut Aatsitassanut Inatsisillu Atuutsinneqarnerannut Naalakkersuisoqarfimmeersut ujarassiuut nunanit allaneersut peqatigalugit piffissami 10.-29. juli Umiammakku Nunaannut, Kangerluarsummut aammalu Nuussuup kujataatungaanut ornigullutik suliaqassapput.

Ornigulluni suliaqarnermi Nuussuup kujataatungaa erseqqinnerusumik misissorneqassaaq, tassami qanittumi sumiiffimmi qaqqap innartaani nikittoqarsimammat.

Aatsitassanut Inatsisillu Atuutsinneqarnerannut Naalakkersuisoqarfiup satellit-ikkut assilisat GEUS-imit misissorneqarsimasut, nikittoqarsimaneranik takutitsisut, tigoreerpai, aammalu assilisat taakkua erseqqinnerusumik takusaanissamik pissutissaqalersitsipput.

Taamaattumik sumiiffimmi Tupaasat Kussinersuata avannamut kitaani 4 km missaanni (nunap assingani ilusiliami sumiiffik aappalorujuttumik qalipaatilik) 600-700 meterinik portussusilimmiittumi ornigulluni takusaanissaq pilersaarutigineqarpoq. Sumiiffik Assapaat aamma Niiortuut akornanniippoq, tassani siusinnerusukkut sisoornerit arlallit pisimallutik.
Vaigatip Sullorsuani angalaassagaanni, pingaartumillu sinerissamiissagaanni imaluunniit sinerissap qanittuaniissagaanni mianersornissaq Aatsitassanut Inatsisillu Atuutsinneqarnerannut Naalakkersuisoqarfiup kaammattuutigaa.

Ornigulluni suliaqarnerup nalaani qaqqaq qajannartortalik nunap assiliorneqassaaq. Tamatuma saniatigut Umiammakku Qaqqaanni alapernaarsuinermi periaaseq nutarterneqassaaq aammalu Kigarsima i Kangerluarsummi Kigarsimap avannamut kangiani nutaamik taamaaqataanik alapernaarsuinermut periaatsimik ikkussuisoqassalluni (nunap assingani sumiiffiit sungaartut).

Sumiiffinni alapernaarsuinermi qaqqanik qajannartortalinnik sunniisartut immaqalu sisoornermik aallartitsisinnaasut pillugit ilisimasanik nutaanik inuiaqatigiit qulakkeerunneqassapput. Nutaanik ilisimasaqalernermi aarlerinaataasunik nalilersuinerit ingerlaavartumik nutarterneqarsinnaalissapput. Alapernaarsuinermi periaaseq ingerlalluartoq ilimasaarutinik qaqqani sisoortussanngortunik ilimasaarisinnaasunik aammalu kalerrisaarutinik pisorpianik nalunaarsuisinnaasunik peqalernissamut alloriarneruvoq siulleq pingaaruteqartoq.

Naalakkersuisut qaqqat sisoortarnerinik alapernaarsuineq pillugu Uummannami, Niaqornani, Qaarsuni, Ikerasanni, Saattuni Ukkusissanilu innuttaasunut paasissutissiillutik ataatsimiititsinissanik, tassungalu atasumik nittartakkamik atuutilersitsinissamik, pilersaaruteqarput.

Paasissutissiilluni ataatsimiinnerit ulluni makkunani ingerlanneqassapput:

30. juli: Uummannaq
31. juli: Niaqornat aamma Qaarsut
1. august: Ikerasak aamma Saattut
2. august: Ukkusissat

Paasissutissanik annertunerusunik piniarnermi attaveqarfigineqassaaq naalakkersuisoqarfimmi pisortaaneq Jørgen T. Hammeken-Holm e-mail joeh@nanoq.gl imaluunniit oqarasuaat +299 346846.