AtuartigukAAPISI pillugu Inatsisartut suliakkiutaat naammassilluarneqarpoq
Nassiussisuuvoq: Aalisarnermut Piniarnermullu Naalakkersuisoqarfik
Inatsisartut aningaasaqarnermut inatsisissaq 2023-mi atuuttussaq aqqutigalugu suliakkiutigaa Aalisartunik Piniartunillu Siunnersuisoqarfik (AAPISI), suliariumannittussarsiuunneqassasoq. Tamannalu pivoq ukioq 2023-p affaani siullermi, suliariumannittussarsiuussisarneq pillugu inatsit toqqammavigalugu.
Ullup killigititap qaangiunnerani suliuariumannittussarsiuussinermi suliffeqarfiit pingasut suliariumanninniarlutik neqerooruteqarsimapput. Neqerooruteqartut nalilersorluareerlugit aalajangiunneqarpoq QAK toqqarneqassasoq.
Suliariumanninniarlutik neqerooruteqartut allat nalunaarfigineqarput suliassaq taakkununnga tunniunneqassanngitsoq. Ilanngulluguttaaq nalunaaruteqarnermi maalaarfissamik piffissamik tunineqarput, tamannalu piffissaq maannakkut qaangiuppoq maalaartoqaranilu.
Taamaalillunilu AAPISI pillugu Inatsisartut suliakkiutaat naammassineqarpoq.
Juulip aallaqqaataaniit AAPISI uani attavigineqarsinnaavoq:
AAPISI
Postboks 1791
Jens Kreutzmannip Aqq. 4, 1. sal
3900 Nuuk
Tel: +299 384160
Email: info@aapisi.gl
Web: www.aapisi.gl