WHO/Europap aamma Kalaallit Nunaata akornanni suleqatigiinnissamut paarlaaqatigiittarnissamullu ukiut nutaat

Peqqissutsimut Naalakkersuisup Mimi Karlsenip aamma Europami WHO'p Immikkoortortaqarfiani Pisortap Dr. Hans Henri P. Klugep ulloq 28. juni 2023-mi WHO'p Europami Immikkoortortaqarfianut pisortatigoortumik pulaarneranut atatillugu suleqatigiinnerup paasissutissanillu avitseqatigiittarnissap maani nunarsuup immikkoortuanut tamarmut isumaqatigiissuteqarput.

"Nunami angeqisumi ikittuinnarnik innuttaqartoq peqqinnissamut misilittagaqarlutalu nutaanik aaqqiissuteqartarpugut- assersuutigalugu nunaqarfinni illoqarfinnilu avinngarusimasuni peqqissutsimut kiffartuussinerit telemedicin atorlugu katsorsaaneq aamma peqqissutsikkut kiffartuussinermik pilersuineq. Misilittakkat taakku nunanut allanut taamatullu Issittumut tamarmut naleqquttuupput. Ukiuni aggersuni WHO/Europa-mik suleqateqarnitta siuarsarnissaanut maanna patajaatsumik tunngavissaqaleratta, attaveqaasersuutit attaveqaqatigiittarfiilu aqqutigalugit misilittakkatta siammarternissaannut nuannaarutigeqaara" taama oqarpoq Peqqissutsimut Naalakkersuisoq Mimi Karlsen.

"Takornariaqarnermik annertusiartortumik silaannaallu allanngortarneranit sunnerneqartumik, sumiiffimmi avinngarusimasumi inuk qitiutillugu pitsaalluinnartumik peqqinnissakkut sullissisinnaaneq nunani amerlasuuni WHO’p europami immikkoortortaqarfiani unammillernartuuvoq" Dr. Kluge'p oqarpoq, nangipporlu:

"Peqqissutsimut Naalakkersuisoq Mimi Karlsen suleqataalu WHO/Europa'p Kalaallit Nunaannik pitsaanerusumik suleqateqalerneranut qutsavigerusuppakka. Suleqatigiinnitta Kalaallit Nunaanni inuit 57.000-it peqqissusaannik taamaallaat pitsaanerulersitseqataaginnassanngilaq, ilisimasatsinnilli avitseqatigiinnerput manna WHO'p Ataani Nunat Mikisut Suliniutaannut (Small Countries Initiative, SCI), tassa Europami naalagaaffiit mikisut 11-nut, sunniuteqassaaq."

Suleqatigiinneq peqqinnissaqarnermik suliaqarfinnut arlalinnut pingaaruteqartunut tunngatinneqassaaq. Suleqatigiinnerup siunertaraa ukioq manna maajimi Kalaallit Nunaanni Peqqinnissaq pillugu Ataatsimiititaliarsuup innersuussutaasa saqqummersinneqartut atulersinnissaasa tapersersornissaa. Suleqatigiinneq ilaatigut peqqinnissaqarfimmi sulisut nukittorsarneqarnissaat, tarnikkut peqqissuseq, tupatornermik nakkutiginninneq, akiuussusersuineq, sakialluut TB aamma kinguaassiuutitigut tunillaattartut aamma WHO/Europap Arbejdsprogramimik taasagaanni suliniutit annerpaartaannut iluaqutaassaaq tassani digitalimik peqqinnissakkut sullissineq tassungalu ileqqut kulturilu pillugit ilisimasat suliarineqassapput.

Kalaallit Nunaannit aallartitat Peqqissutsimut Naalakkersuisoq Mimi Karlsenimit siulersorneqartumit Peqissutsimut Naalakkersuisoqarfimmi pisortaq Nike Berthelsen aamma immikkoortortaqarfimmi pisortaq Aka Olesen, Nunatta Nakorsaanera Henrik Hansen aamma professor Christina Viskum Larsen, Sydddansk Universitetimi Kalaallit Nunaanni Innuttaasut Peqqissusiannik Ilisimatusarfimmi aqutsisoq.

Ullormi junip 28-ani WHO/Europamut pulaarneq Dr. Klugep aamma Danmarkimi Sundhedsstyrelsenimit taamatullu WHO'p siulersuisuini ilaasortaasup Dr. Søren Brostrømip marsimi 2023-mi Kalaallit Nunaannut qaffasissumik suliaqariartorsimanerisa malitsigisaanik pulaarneruvoq.


Paasisaqarnerorusukkuit Naalakkersuisup allattaa Naja Lynge- Petersen attaveqarfigisinnaavat, e-mail: nalp@nanoq.gl imaluunniit oqarasuaammut uunga +299 34 66 41.