AtuartigukBiilinit nakkutilliinerup atuuteqqilernissaanut siuariarneq.
Nassiussisuuvoq: Ineqarnermut Attaveqaasersuutinuullu NaalakkersuisoqarfikKalaallit Nunaanni ukiut 24-t qaangiupput biilinik nakkutilliisoqarmat, massakkulli illoqarfinni annerni biiliutillit biiliminnik nakkutilliiffigitinnissamut isumalluarsinnaalerput.
Ineqarnermut Attaveqaasersuutinullu Naalakkersuisoq Erik Jensen oqarpoq:
”Biilinik nakkutilliinngitsoorneq ukiunik 25-nngortorsiussanngilaq. Taamaattumik Angallannermut Ministerip Thomas Danielsenip saaffiginnissutinnik pimoorussisumik tigusinera, ajornartorsiullu takusinnaammagu, piaartumillu iliuuseqarfiginiarlugu suliniuteqarmat nuannaarutigaara. Taamaattumik Thomas Danielsenilu maanna isumaqatigiippugut, biilinik nakkutilliisoqarnissaanik Kalaallit Nunaata kissaatini Naalagaaffeqatigiinnermi Oqartussaasunut nassiutissagai, tassanngaanniillu Naalagaaffeqatigiinnermi Oqartussaasut nakkutilliinerup isumagineqarnissaa sulissutigissagaat. Nassiussassagut nassiutereerpagut, piaartumillu aaqqiissuteqartoqarnissaa maanna utaqqillutigu. Kalaallit Nunaanni biilinik nakkutilliineq najukkani biilileriffinnut neqeroortitsissutigisinnaalersillugu, tulliuttutut nalunaarusiortoqassasoq naatsorsuutigaara.”
Naalakkersuisut biilinik nakkutilliinikkut biilit bremsiinik ajornartorsiulernermilu atortorissaarutinik atorsinnaanerinik qulakkeerinninnikkut angallannermi isumannaallisaaneq annertuserusuppaat.
Kalaallit Nunaanni biilinik nakkutilliinermi ilaatigut makku kissaatigineqarput:
- Biilinik piginnittut ataasiakkaat nakkutilliinermut aningaasartuutissaat Danmarkimi biiliutillit nakkutilliinermut akiliutigisartagaannit annertuneruallaassanngillat.
- Biilinik nakkutilliinernik illoqarfiit 750-it sinnerlugit biilillit tassa Ilulissat, Sisimiut aamma Nuuk aallaqqaasiullugit ingerlatsiffiussapput.
- Ajoqutinut annernik biilinik nakkutilliisoqassaaq.
Biilinik nakkutilliineq angallannermut tunngasuniippoq, susassaqarfimmullu akisussaaffik tamanna Kalaallit Nunaannit tiguneqarnikuunngilaq. Taamaattumik biilinik nakkutilliineq Naalagaaffiup akisussaaffigaa. Ineqarnermut Attaveqaasersuutinullu Naalakkersuisoqarfiup Naalagaaffimmi Oqartussat ilisimasariaqartunik avitseqatigissavaat nakkutilliinerillu qanoq ingerlanneqarnissaanik siunnersuuteqarfigissallugit.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl