AtuartigukPeqqinnissaqarfimmi kræftimut katsorsaaneq annertusineqartoq
Nassiussisuuvoq: Peqqissutsimut Naalakkersuisoqarfik
2022-mi decembarimi Peqqissutsimut Naalakkersuisoq Mimi Karlsenip misileraataasumik Peqqinnissaqarfimmi kræftimut katsorsaanermik annertusiissoqarnissaanik aalajangerpoq. Misileraaneq ukiup affaa ingerlanneqalereersimavoq.
Aaqqissuussineq ataavartumik atuutilersinneqassanersoq pillugu inaarutaasumik aalajangiisoqannginnerani eqqortumik tamakkiisuunerpaamillu aalajangiinissamut tunngavissaqarnissaq anguniarlugu misileraalluni aaqqissuussineq Peqqissutsimut Naalakkersuisoqarfiup nalilersuleruttorpaa. Nalilersuinerup naammassinerata kingorna aatsaat aaqqissuussineq pillugu inaarutaasumik aalajangertoqarumaarpoq. Nalilersuinerup naammassinissaata tungaanut misileraalluni aaqqissuussineq allannguuteqarani ingerlaannassaaq. Tassa imaappoq napparsimasut annertusisamik katsorsartinnissaannut innersuunneqartarnerat ingerlaannassaaq maannakkullu katsorsaaneq 30. juunip kingorna ingerlaannassalluni.
Peqqissutsimut Naalakkersuisoqarfiup naatsorsuutigaa nalilersuineq aggustimi naammaassineqarumaartoq. Tamatuma kingorna Peqqissutsimut Naalakkersuisoqarfik aaqqissuussineq pillugu nalunaaruteqarumaarpoq.
Nalunaarut una pillugu sukumiinerusumik paasisaqarnerorusukkuit naalakkersuisup allattaa saaffigiuk Naja Lynge Petersen e-mail: nalp@nanoq.gl