Nunaqarfiit iluaqutissaattut angallannermut inatsit allanngortinneqalerpoq

Ineqarnermut Attaveqaasersuutinullu Naalakkersuisoq Erik Jensen Kalaallit Nunaanni angallannermut tunngasunut attaveqaatitut ataatsimiititaliamit innersuussutinik tallimanik tigusaqarsimavoq, taakku Kalaallit Nunaanni angallannermik malittarisassaqartitsinermut nutarterinerupput ilaatigullu nunaqarfinni inuunermut oqinnerulersitsissallutik.

Naalakkersuisoq Erik Jensen oqarpoq:
”Nunaqarfinni ingerlatsisinnaanermut allagartaqarnissamut piumasaqaat ajornartorsiutaasoq kommuninit, KANUNUPE-mit aamma Royal Greenlandimit tusartarsimavarput. Taamaattumik attaveqaatitut ataatsimiititaliaq siulliit ilaanniilluni ilaatigut ingerlatsisinnaanermut allagartaqarnissamut piumasaqaammik sakkukinnerulersitsisumik taamaalillunilu nunaqarfinni inuunermik oqinnerulersitsisumik innersuussuteqarsimanera naammagisimaarpara.”

Danmarkimi assartuinermut ministeri Thomas Danielsen oqarpoq:

” Inatsimmik kalaallinut inuiaqatigiinnut tulluartumik kalaallillu ulluinnaannik pitsaanerpaamik iluaqutaasussamik peqarnissaq pingaaruteqarpoq. Taamaattumik angallannermut tunngatillugu pitsaasunik suliniuteqartoqalernera tusarluarnarpoq. Suliarli tamaannga killeqarnavianngilaq aamma qamuteralannut, ATV-nut UTV-nullu malittarisassat qanimut suli misissorpavut.''

Attaveqaatitut ataatsimiititaliap allannguutissatut siunnersuutai ilaatigut makkununnga tunngapput:

• Nunaqarfinni amerlanerusuni ingerlatsisinnaanermut allagartamut piumasaqaammi qamutit motorillit sulinermut atorneqartartut ilaasa mininnissaannut periarfissaq
• Kalaallit Nunaanni danskit ingerlatsisinnaanermut allagartaannik akuersaarneq, taamaalilluni danskit ingerlatsisinnaanermut allagartaa paarlaatariaarutissalluni
• Teorimut misilitsittariaatsip allanngortinneqarnera, taamaalillutik maannamiit allattariarsornertut ingerlanneqartalerlutik
• ATV-nut UTV-nullu piumasaqaatinik allannguineq
• Qamuteralaat pillugit malittarisassat nutaat, tassunga ilanngullugit qanoq ukioqqortutiginissamut piumasaqaammik appartitsinissaq.

Qamuteralannut, ATV-nut UTV-nullu malittarisassat nutarterneqarnissaat suli sulissutigineqarput.

Tamatuma kingorna inatsisissatut siunnersuutit pisariaqartinneqartut nalunaarutinullu allannguutit suliarineqassapput. Tamatuma kingorna siunnersuutit tamanut tusarniaassutigineqassapput Naalakkersuisullu nittartagaanni atuarneqarsinnaajumaarlutik.

Attaveqaatitut ataatsimiititaliap tunuliaqutai
Attaveqaatitut ataatsimiititaliamiipput Danmarkimi angallannermut ministereqarfimmit aamma angallannermut aqutsisoqarfimmit, Kalaallit Nunaanni Politiinit aamma Ineqarnermut Attaveqaasersuutinullu Naalakkersuisoqarfimmit atorfilittat. Ataatsimiititaliaq 2020-mi pilersinneqarpoq Kalaallillu Nunaanni angallannermut inatsimmi suliassaqarfinnik arlalinnik iluarsiinissamut pisariaqartitsinerup periarfissallu qulaajarnissaat taannalu tunuliaqutaralugu inatsimmut allannguutissatut siunnersuuteqarnissaq suliassarai.


Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl