Íslandip Nunanut Allanut tunngassutilinni Naalakkersuisuata, Þórdís Kolbrún Reykfjörð Gylfadóttirip aamma Kalaallit Nunaanni Nunanut Allanut tunngassutilinni Naalakkersuisuata, Vivian Motzfeldtip akornanni peqatigiillutik tusagassiorfinnut nalunaarutaat

Uagut, Kalaallit Nunaanni Íslandimilu Nunanut Allanut tunngassutilinni Naalakkersuisut juunip 22-anni aamma 23-anni Nuummi Kalaallit Nunaanni naapippugut.

Kalaallit Nunaata Íslandillu akornanni suleqatigiinnissamut isumaqatigiissut Kalaallit Nunaanni Íslandimilu Naalakkersuisut siulittaasuisa Reykjavíkimi oktobarip 13-ianni 2022-mi atsioqatigiissutigisimasaat uppernarsaqqippaat, isumaqatigiillutillu Kalaallit Nunaata Íslandillu isumaqatigiissutaat illugiilluni suleqatigiinnermut sinaakkutaassasoq.

Naalakkersuisutut niuernermik akisussaaffeqartutut imminut pisussaaffilersimavugut naapertuilluartumik niuernikkut attaveqaqatigiinnissamut akimmiffiusinnaasut periarfissallu suunersut siunersiumallugit.

Tamanna siunertaralugu isumaqatigiissimavugut peqatigiilluta suleqatigiiffiliorniarluta, tassanilu misissorneqassasoq siunissami niuernissaq pillugu isumaqatigiissutissaq qanoq piviusunngortinneqarsinnaanersoq, nunagisatta akornanni niueqatigiinnissaq patajaatsoq qanoq ingerlanneqarsinnaanersoq pillugu periarfissat naapertuuttut tamaasa misissorlugit, soorlu aalisarnikkut suleqatigiinneq niueqatigiinnerlu, taamatullu isumaqatigiissuteqartoqartillugu illuatungeriit iluaqutigisinnaasaat erseqqissarlugit.

Isumaqatigiissut qanoq piviusunngortinneqarsinnaanersoq pillugu misissukkap immikkoortortassai, soorlu atukkat, anguniagassat sinaakkutissallu suleqatigiit namminneq nassuiaasersussavaat.

Piviusunngortitsinissamut periarfissat pillugit misissuineq naammassereerpat, isumaqatigiippugut niuernikkut attaveqartarnitta siunissaa pillugu oqaloqatigiinneq aallartisarneqassasoq.

Paasissutissat sukimiinerusut pillugit saaffissaq:

Naasunnguaq Beck Kristensen
Toqq/direkte +299 34 50 00
nabk@nanoq.gl