Ilinniartitaanermut mingutsitsinngitsumillu aningaasarsiornikkut siuariartorneq pillugu EU Kommissionimik ukiup affakkaartumik ataatsimeeqateqarneq

EU-kommissionip aamma Kalaallit Nunaata akornanni oqaloqatigiillutik ukioq manna siullermik ataatsimiinnerat naammassilluarpoq.

Ataatsimiinneq 15.-16. junimi ingerlanneqarpoq tassanilu Kalaallit Nunaannut 2021-2027-mi 225 mio. EUR-t missaanniittunik missingersuutinut tapiissuteqartarnissamut ukiuni arlalinni pilersaarut sammineqarpoq. Pilersaarut Multiannual Indicative Programmetut taaneqarpoq, taassuminngalu ilinniartitaanerup, avatangiisit, ilisimatusarnerup, uumasut assigiinngisitaartuunerannut tunngasut, silap pissusaanut nukissiuutinullu tunngasut pitsaasumik ineriartortinnissaannik tapersersuinikkut Kalaallit Nunaanni inuiaqatigiinni piujuartitsisumik tunngaveqarluni aningaasarsiornissamut periarfissanik annertusaanissaq siunertaavoq.

Ataatsimiinneq internet aqqutigalugu ingerlanneqarpoq taamaalillunilu peqataasut assigiinngitsut, ilaatigut nukissiuutinut tunngasuni ingerlatsisut, nunami kommuninit tamanit, EU-Kommissionimit, Naalakkersuisunit danskillu naalakkersuisuiniit atorfilittat peqataasimallutik.

EU-p aningaasatigut tapersiissutissanut pilersaarutini saqqummiuppaa, tapersiissutissatut pilersaarut Kalaallit Nunaata nukinnik ataavartunik annertunerusumik atuilernissaanut, issittumi ilisimatusarnermut, ilisimatusarnermut, silap pissusaanut, uumasut assigiinngisitaartuunerannut nunallu pinngortitami pisuussutaannik piujuartitsisumik atuinissamut iluaqutaassaaq.

Ukiuni amerlasuuni ilinniartitaanermut tunngatillugu suleqatigiissimaneq aamma eqqartorneqarpoq. Ilaatigut ilinniartitsisut perorsaasullu ilinniarsimasut amerlanerunissaannik pisariaqartitsineq kiisalu ilinniartitaanerup aaqqissuussaanerani inuusuttut ilaatinneqartarnissaannik ilinniarnerminnillu unitsitsisannginnissaannik aallussilluarnerulernissaq annertuumik isumaqataaffigineqarput.

Ataatsimiinnermi oqaatigineqarpoq 2023-p ingerlanerani EU-p Nuummi allaffissaata nutaap ammarneqarnissaa naatsorsuutaasoq.


Annertunerusumik paasisaqarusukkuit immikkoortortaqarfimmi pisortaq Dorthe Bidstrup attavigiuk, dbip@nanoq.gl tlf.nr.: 345723