Ålandip peqqissutsimut ministeriata nunarput tikeraarpaa

Juunip 13-iani 14-ianilu Peqqissutsimut Naalakkersuisup Mimi Karlsenip Ålandimi Peqqissutsimut ministeri Annette Holmberg-Jansson naalakkersuisoqarfimmi pisortamik Bengt Michelssonimik ingiallorteqartoq tikeraartigaa.

Peqqissutsimut Naalakkersuisoqarfik, Nunatta Nakorsaaneqarfia, Peqqissutsimut Aqutsisoqarfik, Dronning Ingridip Napparsimmavissua aamma Allorfik tikeraarnerani pulaarneqarput.

Nunatsinni peqqinnissaqarfik pillugu paasissutissiinissaq, kiisalu ataatsimut soqutigisanik unammilligassanillu isummersoqatigiinnissaq, nunallu marluusut ikittuinnarnik siammasissumillu isumaluutillit kiisalu sulisussaqarniarnermik ajornartorsiutit paasissutissiissutigineqarnissaat suleqatigiinnermillu periarfissat pillugit paasissutisseeqatigiinnissaq tikeraarnermi siunertarineqarput.

Peqqissutsimut Naalakkersuisoq, Mimi Karlsen ima oqarpoq:
”Avataanit soqutigineqaraluttuinnarneq takusinnaallugu nuannerpoq. Ullumikkut peqqinnissaqarfitta peqqissutsip tungaatigut sulisussarsiortarnera ajornartorsiutaasorujussuummat nunanit allanit suleqatissat isumassarsiornerullu tungaatigut periarfissanik nutaanik ujartuisarnissarput pingaaruteqarpoq.”.

Paasisaqarnerorusukkuit Naalakkersuisup allattaa Naja Lynge Petersen attaveqarfigisinnaavat, e-mail: nalp@nanoq.gl imaluunniit oqarasuaammut uunga +299 34 66 41.