Nalunaarutit.gl – Qarasaasiatigut inatsisinik nalunaarutit aammalu saqqummiussinernut nittartagaq nutaaq

Nalunaarutit.gl, Namminersorlutik Oqartussat qarasaasiatigut inatsisinik nalunaarutinut aammalu saqqummiussinernut nittartagaat nutaaq, Namminersorlutik Oqartussat saqqummersippaat. Nalunaarutit.gl, pisoqqamut Lovgivning.gl-imut taartigitinneqarpoq.

Nalunaarutit.gl imarisai
Nalunaarutit.gl imarisai Lovgivnig.gl-itoqqamut sanilliullugu annertuumik annertusitinneqarput. Ilaatigut Nalunaarutit.gl aamma naalagaaffimmi inatsisinik aammalu nunani tamalaani maleruagassanik Kalaallit Nunaannut atuuttunik, kiisalu kaajallaasitanik, malittarisassanik ilitsersuutinillu, imaqarpoq.

Nalunaarutit.gl quppernernut marlunnut agguagaavoq. Inatsisinik nalunaarutit aammalu nalunaarutiginninnernut nittartagaq. Tamatuma saniatigut inatsisinut toqqorsivik tassunga atatinneqarpoq, tassaniillutik Namminersorlutik Oqartussat inatsisai aamma allaffissornikkut peqqussutit 1. januar 2010 sioqqullugu atorunnaarsinneqartut.

Inatsisinik nalunaarutit imarisai
Inatsisinik nalunaarutiniipput Namminersorlutik Oqartussat inatsisai, naalagaaffiup inatsisai Kalaallit Nunaannut atuuttut aammalu nunani tamalaani maleruagassat Kalaallit Nunaanni atuuttut. Tamatuma saniatigut tassaniipput allaffissornikkut peqqussutit Naalakkersuisunit aammalu danskit naalakkersuisuinit aalajangersarneqartut. Kiisalu aamma tassaniipput kommunini maleruaqqusat, taakkua innuttaasunut ingerlaannaq atuuttussaappata, Inatsisartut inatsisaanni, Inatsisartut peqqussutaanni imaluunniit Namminersorlutik Oqartussat nalunaarutaanni inatsimmi tunngavilimmik aalajangersagaasut.

Saqqummiussinernut nittartakkap imarisai
Saqqummiussinermut nittartakkami Namminersorlutik Oqartussat inatsisini maleruagassiineri saqqummiunneqartassapput, tassa imaappoq Inatsisartut inatsisai aamma Namminersorlutik Oqartussat nalunaarutai. Saqqummiussinermut nittartakkami taamatuttaaq kommunini maleruaqqusat, taakkua innuttaasunut ingerlaannaq atuuttussaappata, Inatsisartut inatsisaat, Inatsisartut peqqussutaat imaluunniit Namminersorlutik Oqartussat nalunaarutaat naapertorlugu aalajangersagaasut.

Nalunaarutit.gl-imut apeqqutit, oqaaseqarnerit oqaaseqaatillu, Naalakkersuisut Siulittaasuata Naalakkersuisoqarfiani Inatsisilerinermut immikkoortortaqarfianut nassiunneqarsinnaapput uunga e-mail: nsninatsit@nanoq.gl.

Naalakkersuisut Siulittaasuata Naalakkersuisoqarfia