AtuartigukIlulissani, Aasianni, Sisimiuni, Qaqortumilu ilinniartut inissaat sanaartorneqassapput
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Ilulissani, Aasianni, Sisimiuni, Qaqortumilu ilinniartut inissaannik sanaartornissamut aningaasanik atugassiinissamik Naalakkersuisut noqqaassutigisaat, Aningaasaqarnermut Akileraartarnermullu Ataatsimiititaliap marlunngormat juunip 13-iani akuersissutigaa. Ataatsimiititaliap akuersissuteqarneratigut, sanaartorneq 2023-p qiteqqunnerani aallartinneqarnissaa siunertaralugu inaarutaasumik isumaqatigiissutissat maanna isumaqatigiissutigineqarsinnaalerput. Ilinniartut inissaat 2025 tikillugu ataavartumik tunniunneqarlutillu, atulerneqassasut naatsorsuutigineqarpoq.
Illoqarfinni pingaarnertut ilinniartoqarfiusuni tallimaasuni Ilulissani, Aasianni, Sisimiuni, Qaqortumi, Nuummilu naammattunik ilinniartunut inissiaqarnissamik qulakkeerinnissalluni suliniummut ’Ilinniartut ineqarfii nalinginnaasut’-nut atatillugu, Immikkoortoq 2-tut ilinniartut inissaat sanaartorneqassapput. Immikkoortoq 1 sanaartorneqarluni aallartinneqareerpoq, immikkoortoq 3-lu kingusinnerusukkut neqeroortitsissutigineqassalluni.
Ilisimasat ilinniarnerlu ilanngullugit isumalluutinik pisariaqartitanik ineriartortitsinissaq aalajangiisuullutik, nunap imminut napatilernissaanik Naalakkersuisut anguniagaqarnerinut nunatsinni ilinniartut inaannik amerlisaaneq atavoq. Inuiaqatigiinni ilinniarsimassutsip qaffassarneqarnissaanik anguniagaq tunngavissinniarlugu, ilinniartut ilinniarnerminni avatangiisii pitsaanerulertariaqarput, matumani ilinniarnerminni ilinniartut inaanni ineqarnissaminnut periarfissagissaarnerunissaat ilanngullugu.
Naalakkersuisoq Aqqaluaq B. Egede ima oqarpoq:
”Ilinniartut ilinniarnerini toqqissisimanermik pilersitseqataasinnaasumik, ilinniartunut pitsaasunik atugassaqartitsinissaq pingaaruteqarpoq. Taamaattumik ilinniartunut, inuiaqatigiinnullu iluaqutaasussanik ilinniartut inissaannik amerlanerusunik sanaartornissaq nuannaarutigalugu maanna aallartissinnaanngorparput.”
Naalakkersuisoq Erik Jensen ima oqarpoq:
”Ilinniartut inissaat piffissami sivisuumi sulissutigineqarlutillu isumaqatiginninniutigineqarput, taamaattumillu naammagisimaarinnilluarluta anguniagarput maanna anguarput. Nunatta imminut napatilernissaanik anguniakkatsinnut ilinniarneq pingaarutilimmik inissisimavoq, maannalu ilinniartut ilinniartut inaanni ineqarsinnaanerisa pitsaanerulersinneqarneratigut anguniagarput qaninnerulersinnaaleratsigu nuannaarutigaara.”
Ilulissani Aasiannilu ilinniartut ineqarfissaat 14-inik siniffittaqarlutik kisimiittunut, aappariinnut, ilaqutariiaqqanulluunniit inissiaassallutik type ”Apartments/inissiat”-tut sanaartorneqassapput. Sisimiuni ilinniartut ineqarfissaat ”Apartments/Inissiat”-ut aamma sanaartorneqassapput, taassumalu saniatigut 64-inik siniffissaqarlutik ilaqutariinnut ineqarfissat marluk type ”Bolig+”-itut aamma sanaartorneqassallutik. Qaqortumi ilinniartut 16-it 19-illu akornanni ukiullit ineqarfissaat 36-nik siniffissallit, type ”Dormitory/ineeqqatut”-tut sanaartorneqassapput.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl