Peqqissutsimut Naalakkersuisoq Mimi Karlsenip piffissami 7.- 10. juni 2023 Qaanaaq tikeraarpaa

Tikeraarnermini Peqqissaavik, Utoqqaat Illuat, Ilaqutariillu Illuat orninneqarput. Inuusuttunut inissiassat aasamut nutserfigineqarnissaminut piareertussat alakkarterneqarput. Soqutiginnittunuttaaq Innuttaasut illuanni nammineq nerisassanik nassarluni ataatsimut nerrittoqarpoq.

Tikeraarneq naggaserlugu innuttaasunik ataatsimiititsisoqarpoq. Innuttaasunik ataatsimiititsinermi innuttaasunik qanimut oqaloqateqarnissaq, innuttaasut peqqissusaat, Peqqinnissaq pillugu Ataatsimiititaliarsuup isumaliutissiissutaa pillugu paasititsineq kiisalu Naalakkersuisut Inatsisartuni partiit suleqatigalugit piffissami aggersumi suliassat ingerlatseqqitassaat pillugit saqqummiinissaq siunertarineqarpoq.
Spiralilersiusoqarsimanera pillugu suliaq, utoqqarnik suliassaqarfik peqqinnissaqarfimmilu sulisussaaleqinerujussuaq innuttaasunik ataatsimiititsinermi eqqartorneqartut annersaraat.

Mimi Karlsen oqarpoq:
”Qaanaamiininni inuttaasunit qanilaarnerujussuarmik, saaffigiuminassusermik tikilluaqqusinermillu misigaanga. Illoqarfik avinngarusimasumiinnera qularnanngilluinnarpoq arlaanillu nukinginnartumik pisoqartillugu soorlu napparsimasoqarnerani ajutoortoqarneranilu attaveqarniarnerup kipiluttunarsinnaanera paasinarpoq. Taamaattumik base maannga qanittumiittoq arlaatigut qanimut suleqatiginerusinnaanera pillugu periarfissanik misissuiniarlunga siunnerfeqarpunga"

Nangipporlu...
”Paasinarsivortaaq arnat inuusuttut Qaanaami nunaqarfiinilu najugaqartut pinngitsaalillugit aaqqissuusaanikkut spiralilersorneqarsimasut. Arnanut alianaqisumik oqaluttuarsimasunut qujarusuppunga.”


Paasisaqarnerorusukkuit Naalakkersuisup allattaa Naja Lynge Petersen e-mail: nalp@nanoq.gl imaluunniit oqarasuaammut uunga +299 34 66 41 attaveqarfigisinnaavat.