Greenland Minerals A/S-ip Naalakkersuisunit itigartinneqarnerata tamanut saqqummiunneqarnera

Greenland Minerals A/S Kuannersuarni ilaatigut aatsitassanik qaqutigoortunik, zinkinik uranimillu piiaanissamut akuersissummik ulloq 17. juni 2019 qinnuteqarpoq. Ulloq 1. juni 2023 Greenland Minerals A/S-ip Kuannersuarni aatsitassanik piiaanissamut qinnuteqaataa Naalakkersuisut itigartillugu nalunaarutigaat.

Aalajangiineq matumuuna kalaallisut, danskisut tuluttullu tamanut saqqummiunneqarpoq, linkimi matumani.

Tamanut ammasumik saqqummiussinissamut qinnuteqartup tamanut ammasumik saqqummiussinissamut akerliliissuteqarsinnaanera utaqqimaarneqarsimavoq.

Allakkiani takuneqarsinnaasutut, suliassamut qinnuteqaatip uranimik piiaanissaq pillugu inatsimmik unioqqutitsinerusussaanera, Naalakkersuisut itigartitsinerminnut tunngavilersuutigaat.

Naalakkersuisut taamatuttaaq naliliipput itigartitsineq taarsiissutitalimmik arsaarinninnerunngitsoq.

Annertunerusumik paasisaqarusunnermi saaffigineqarsinnaavoq Naalakkersuisumut allatsi Jeanette L. Petersen oqa. +299 34 52 06 imal. jelp@nanoq.gl