Ittoqqortoormiini inuusuttunut inissiat sisamat sananeqassapput

Ittoqqortoormiini inuusuttunut inissianik sisamanik pilersitsinissamut aningaasaliinissaq Inatsisartut Aningaasaqarnermut Akileraartarnermullu Ataatsimiititaliaata akuerimmagu Ineqarnermut Attaveqaasersuutinullu Naalakkersuisup Erik Jensenip nuannaarutigilluinnarpaa.

Akuersissuteqarnikkut inaarutaasumik isumaqatigiissutit inississinnaalerput, tamatumalu umiarsuup siulliup angumerinissaa siunertaralugu atortussat inniminnerneqarnissaat aallartissinnaanngorpoq. Sanaartorneq taamaalilluni 2023-p qiteqqunnerani aallartinneqarsinnaanngorluni, inuusuttunullu inissianik tunniussineq atuinerlu 2025-p aallartinnerani pissasoq naatsorsuutigineqarpoq.

Inuussuttunut inissiat sisamat katillugit 212 m2-nik initussusillit sanaartorneqassapput, taamaalillutillu inissiat marluussallutik. Inuusuttunut inissiat nunaminertani marlunni sananeqassapput, taakkulu Kommuneqarfik Sermersuumit kiisalu najukkami ikiorteqarluni sumiiffissinneqarput, tamatumuuna apisarnermut pissutsinik il.il. ilisimasaqartunit pisariaqartitanik peqartoqarmat.

Inuusuttunut inissialiassat sanaartornissami inuusuttut najukkaminni najugaqaannarnissaat siunertaavoq, tassami nunatsinni najugaqarfiit minnersaanni inuusuttunut inissianik pisariaqartitsineq naapertorniarneqartussaammat. Inuusuttut arlaqartut najukkaminni najugaqaannarnissartik kissaatiginikuuaat, inissialli inuussuttut namminneq pisariaqartitaannut immikkut naleqqussakkat tamatumani amigaataanerat unammillernartuuvoq.

Ineqarnermut Attaveqaasersuutinullu Naalakkersuisup oqaatigaa:
”Nuannaarutigaara inuusuttunut inissianik sanaartornissamik isumaqatigiinniuteqarnitsinni aammaarluta angusaqarsimagatta, taamaalillunilu sulineq aallarnerneqarsinnaanngorpoq. Nuannaarutigaara inissiat sanaartorneqarnissaminnut piareermata, tamatumalu kingorna inuusuttut nutsersinnaanngussallutik.”

Inuusuttunut inissialiortiternermik aaqqissuussineq
Inuusuttunut inissiat assigiinnik aaqqissuussinernut atatillugu ineriartortinneqarput, tamatumanilu aallaavigineqarpoq inissiat inoqarfinni minnerni ajornanngitsumik sanaartorneqarsinnaanissaat, kiisalu piujuartitsinermik pitsaassutsimillu ataatsimut takorluugaqarnerup naapertorneqarnissaa, taamaaliornikkullu aningaasaqarnermut, avatangiisinut, silap pissusianut inooqatigiinnullu isiginiakkat oqimaaqatigiissinneqarsinnaallutik.

Suliniut inuusuttut inersimasunngornermut ineriartornerannut aallarnerfissatut eqqarsaataavoq, taamaaliornikkummi inuusuttoq nammineersinnaalernissaminut ikorfartorneqarsinnaassammat. Ikaarsaariarneq inuusuttumut ajornannginnerulersinniarlugu inissiat tamarmik assigiinnik pequtsersugaapput, taamaaliornikkummi iserternermi pisarissersortoqarpallaassangilaq, inissiamillu attartortup inissiamut iserternermini aningaasartuutai taamaalillutik minnerpaaffimminiissinnaallutik.

Inissiartai inissiatut ataatsimik initalittut aaqqissugaapput 45 m²-it missaannik initussuseqarlutik, isaarissap angisuup saniatigut erruivimmut errorsivimmullu inissaqartitsisoqarluni. Isaarissamiit uffarfimmut/perusuersartarfimmut inimullu torsuusamit isertoqarsinnaavoq. Inimiipput igaffik neriffissamik inissaqartoq, sukisaarsaartarfillu sofa issiaarfiutigaluni siniffiusinnaasoq. Qerititsivimmullu aamma inissaq piniarnermilu atortunut inissaq eqqarsaatigineqarnikuupput, inissiamut atasumik quimik sanasoqarneratigut.


Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl