AtuartigukMúte: Issittumut tunngatillugu siuttuussaagut
Nassiussisuuvoq: Naalakkersuisut Siulittaasuata Naalakkersuisoqarfia
Naalagaaffeqatigiit ataatsimiinnerat Naalakkersuisut Siulittaasuanit Múte Bourup Egedemit, statsminister Mette Frederiksenimit kiisalu lagmand Aksel V. Johannesenimit peqataaffigineqartoq naammasseqqammerpoq. Nunani pingasuni Naalakkersuisut siuttuisa Nunanut Allanut, Sillimaniarnermut Illersornissamullu Attaveqartarnermut Ataatsimiititaliaq ataatsimeeqatigaattaaq.
Múte Bourup Egede: ”Nunarsuarmioqataavugut nunarsuarmilu pisunut qanilliartortussaavugut soorluttaaq nunarsuarmioqatitta uagut qanillattoraatigut. Taamaattumik nunarsuatsinni nalorninartumik inissisimanitta nalaani suleqatigiinnissarput pingaaruteqarpoq pingaartumik nunanut allanut, sillimaniarnermut illersornissamullu tunngatillugu.
Qulaatiinnarluta iliuuseqartoqartarnera akuerisinnaanngilara. Taamaattumik erseqqissaatigissavara apeqqutini Kalaallit Nunaannut issittumullu tunngassuteqartuni siulliulluta sammiviliisartussaagatta.
Aaqqiagiinnginnerit pissutsinik nalornilersitsisinnaasarput tamakkuli aaqqiissuteqarfiginissaat aamma pisussaaffigaavut" Múte Bourup Egede taamak oqarpoq.