Kalaallit Nunaata, USA-p nunallu allat akornanni niuerneq aamma aningaasaliisarneq pillugit nittartakkamik tradeinvest.gl-imik saqqummiussineq

Kalaallit Nunaata aamma nunat allat akornanni, niuerneq aamma aningaasaliisarneq pillugit paasissutissarsiortunik, suliffeqarfinnik ikorfartuisussamik nittartakkamik nutaamik, tradeinvest.gl, Nunanut Allanut, Inuussutissarsiornermut Niuernermullu Naalakkersuisoqarfik saqqummiussivoq.

Aammattaaq nittartagaq, nunani allamiut ingerlatseqatigiiffiit aningaasaliisartullu, Kalaallit Nunaanni peqatigiumasinnaasanik nassaarnissamut, sakkutut atorsinnaassaaq. Taamaattumik Kalaallit Nunaanni suliffeqarfinnut, nunani tamalaani attavigisartakkaminnik annertusaanissamut soqutigisaqartunut, siunissami suleqatigilersinnaasanik attavissanik pilersitsiffiusinnaasumut, suleqatissanik-nassaarfissiamut nittartakkamut allatsinnissamut, periarfissaqarpoq.
Tamatuma saniatigut, kommunini inuussutissarsiornermut siunnersortinut assigiinngitsunut, aamma kommunini aammalu nuna tamakkerlugu inuussutissarsiornermut kattuffinnut attavilersuutit aammattaaq nassaassaassapput.

Suliffeqarfinnut paasissutissanik, soorlu Kalaallit Nunaata nunat allat akornanni nioqqutissanik eqqussuinerup aamma annissuinerup iluani piumasaqaatinik aamma maleruagassanik attuumassutilinnik, nittartagaq imaqarpoq. Nittartakkami Kalaallit Nunaanni suliassaqarfiit assigiinngitsut, soorlu aalisarneq, aatsitassat aamma aatsitassarsiorneq, takornariartitsisarneq, sermeq aamma imeq aamma ilisimatusarneq pillugit nassuiaateqarpoq. Tamanna, aningaasaliinissamut periarfissat pillugit aalajangersimaqqissaartunik paasissutissanik nassaarnissamut, imaluunniit tamakku suliassaqarfiit iluanni nioqqutissanik eqqussuinissamut aamma annissuinissamut, aningaasaliisartunik aamma niueqatigiinnik, oqilisaassisuussaaq. Nunanut Allanut Inuussutissarsiornermut Niuernermullu Naalakkersuisup Vivian Motzfeldtip nittartagartaaq pillugu ima oqaaseqarpoq: “USA-mik suleqateqarneq nuannaarutigaara, tamatuma anguniakkat pitsaasut soorlu una nittartagartaaq, nunatta avammut niueqateqarneranut nunatsinnullu aningaasaliisussarsiorneranullu atorluarsinnaasoq, pilersissinnaanissaanut aqqutissiuussimmat.”

Nittartagaq piareersarneqartoq, tamatumani siullermeertumik, ulluni 1.-2 februar 2023-imi ingerlanneqartumi nalunaarutigineqarluni, U.S.-Greenland Virtual/Hybrid Business Forum-imik (USA-p Kalaallillu Nunaata akornanni Qarasaasiakkut/Nioqqutinik Assigiinngitsorpassuarnik Niueqatigiissinnaanermut Naapeqatigiisitsilluni Oqalliffiup) oqalliffiup ilassutaatut saqqummiussineq pivoq. Kalaallit Nunaata USA-llu akornanni annertusisamik niueqatigiinnissamut periarfissat oqallisigineqarnissaat siunertaralugu, USA-meersut aamma Kalaallit Nunaanneersut inuussutissarsiortunit aamma aningaasaliisartunit aallartitat, aaqqissuussinermi peqataatinneqarput.


Attavissaq:
Naasunnguaq Beck Kristensen
Email: nabk@nanoq.gl
Mobil: +299 533684