NemKonto 2023-mi aggustip 12-iani atuutilissaaq
Nassiussisuuvoq: Naalakkersuisut Siulittaasuata Naalakkersuisoqarfia![](/-/media/billeder/logoer/nemkonto.jpeg?cx=0.5&cy=0.5&cw=975&ch=415&hash=98B781C786432AF1E4839C58B6A65AF6)
Aggustip 12-ianinngaanniit innuttaasut suliffeqarfiillu pisortanit aningaasanik pissarsisartut tamarmik NemKontoqalereersimassapput. NemKonto tassaavoq bankimi konto pisortani oqartussaaffeqarfinnit tamanit aningaasanik nuussisarfiat. Bankimi konto pineqartoq kontovoq nalinginnaasoq pigeriigaq. Bankimi konto NemKontotut atorusutaq nammineerluni toqqaannagassaavoq.
NemKonto atulerpat innuttaasunut suliffeqarfinnullu ajornaannerulersussaavoq, tassami kontonormut oqartussaaffeqarfinnut assigiinngitsunut paasissutissiissutigisariaarutissammata innuttaasummi suliffeqarfiilluunniit NemKontotut atugassatut toqqagaat tamanit atorneqalersussaagami.
Pingaaruteqarpoq erseqqissaassutigissallugu innuttaasut suliffeqarfiilluunniit bankimi konto-i pisortanit takuneqarsinnaanngimmata. Pisortani oqartussaaffeqarfiit taamaallat NemKontomut aningaasanik nuussiinnartartussaapput, aamma kontomi aningaasanik tigusisinnaanatillu kontomi atuinerit takusinnaanngilaat.
Innuttaasut suliffeqarfiillu pisortaniit 2023-mi aggustip 12-iani aningaasanik nuussivigineqartassagunik NemKonto atugassatut nalunaarsortissavaat.
Innuttaasut NemKonto netbankimikkut imaluunniit bankimut saaffiginninnermikkut nalunaarsortissinnaavaat. Aamma NemKonto uani nalunaasortinneqarsinnaavoq www.nemkonto.dk
Suliffeqarfiit NemKontotik taamaallaat bankiminnut saaffiginnillutik nalunaarsortissinnaavaat.
NemKonto sunaava?
NemKonto pisortani ataatsimut aningaasanik nuussinermut atortuutitaavoq. NemKonto atortorissaarutaavoq CPR-normunut imaluunniit CVR-normunut bankkontomiittunut NemKontotut toqqakkanut naapertuuttoq. Taamaalillutik pisortat aningaasanik nuussisussat inunnut suliffeqarfinnulluunniit aningaasanik tigusisussanut eqqortumik nuussinissaat qulakkeerneqassaaq. Pisortanit aningaasanik nuussisussat tamarmiullutik NemKontomut nuussisalissapput, nuussassaallu tassaasinnaapput:
- Akileraarutitigut sinneqartoorutit
- Pisortani sulisunut akissarsiat soraarnerussutisiallu
- Isumaginninnikkut ikiorsiissutit
- Ineqarnermut tapiissutit
- Ilinniagaqarnermusiat
- Netbankinnut iserlutit takusinnaavat NemKontoqarnerlutit – peqanngikkuit maannakkut pisaartariaqarputit!
- Nemkonto.gl-imut iserlutit takusinnaavat NemKontomik
- Aningaaserivinnut sianerlutit atuisutut siunnersortit saaffigiuk
Danskit bankkontoannik peqarsimaguit, taava NemKontoqarsimassaatit - takulaarniariuk.
Qanoq NemKontutaarsinnaavunga?
- Netbankinnut iseriarlutit NemKontossannik toqqaagit
- Kinaassutsimut uppernarsaammik nassarlutit aningaaserivimmi siunnersortit orniguk
- Kinaassutsimut uppernassaammik nassarlutit innuttaasunut sullissivimmukarit sullissisumillu ikiorneqarlutit
- www.NemKonto.dk -mut iseriarlutit NemKontumik toqqaagit - taamaalioreeruit allakkamik atuutitsilersitsissummik nassinneqassaatit, taannalu tigugukku oqarasuaatikkut NemKonto atuutilersissavat (allagaq sapaatip-akunneri pingasut tikinniartarpoq)
- Kinaassutsimut uppernarsaateqanngikkuit sumiiffinni innuttaasunut sullissivik saaffigiuk
Netbaneqarpit MitID-qarlutillu? Taava MitID atorlugu NemKontoqarnerlutit takusinnaavat – minutsit marluk taamaallaat atussavatit
Aningaaserivinnukarsinnaavit? Taava kinaassutsimut uppernarsaatit nassarlugu siunnersortit peqatigalugu NemKontotaarit
Illoqarfiit/nunaqarfiit innuttaasunut kiffartuussiveqarpa immaqaluunniit innuttaasunut kiffartuussivimmit aallartitaqarpa? Kinaassutsimut uppernarsaat nassarlugu innuttaasunut kiffartuussivimmukarit, innuttaasunuut kiffartuussivimmit ikiorneqarlutit NemKontutaarsinnaavutit
Kinaassutsimut uppernarsaateqanngilatit? (passi immaqaluunniit biilersinnaanermut uppernarsaat) Taava ilinnut akisussaasup atsiorneranik najugaqarnermullu uppernarsaammik nassarlutit innuttaasunut kiffartuussivimmukarit – immaqaluunniit inunnik marlunnik kinaassutsinnut uppernarsaasinnaasunik, kinaassutsimut uppernarsaatilinnik nassarsinnaavutit
MitID atorlugu nemkonto.gl-imut iserit
- NemKontotut atorniakkat kontonormu allaguk
- Allakkatigut allakkamik atuutilersitsissutissannik nassinneqassaatit (sapaatip-akunneri pingasut missaat qaangiukkaangata tikittarpoq)
- Atuutilersitsinissamut sianerfissaq aqqutigalugu NemKonto atuutilersinneqassaaq
Paasissutissat allat pissarsiariniaraanni Digitalimik Sullissinermut Aqutsisoqarfimmi pisortamut Katrine Hjelholt Nathanielsenimut mailikkut paasiniarneqarsinnaapput maana kat@nanoq.gl
NemKonto pillugu paasissutissat allat atuarsinnaavatit uani: https://www.sullissivik.gl/Emner/B_NemKonto/NemKonto?sc_lang=kl-GL
Pisortat akiliisarneri il. il. pillugit Inatsisartut inatsisaat nr. 10, 19. november 2020-meersoq (L 10 2020)
https://inatsisit.gl/lov?rid={DBE08087-1116-4118-9BCC-A5A890D3170E}