Avatangiisinut Aningaasaateqarfik 2023-mi suliassanut nutaanut 22-nut 7 millioner koruuninik aningaasaliissaaq

Avatangiisinut Aningaasaateqarfik ukioq manna suliassanut nutaanut 22-nut, namminersortunit, suliffeqarfinnit aammalu kommuninit aallarnisarneqartussaanut 7 millioner koruuninik agguaasissaaq. Ilaatigut Kommune Kujallermi aamma Qeqqata Kommuniani eqqagassat suliarineqartarnerinik pitsanngorsaanerit, Paamiuni Nuummilu aalisakkanut qassutinik saliisoqarnissaa, puiaasanik utertitsisarnerup ineriartortinneqarnissaa kiisalu nunaqarfinni peqatigiiffiit suliassaqartinnissaat tapiiffigineqassapput.

“Nuannaarutigaara ukioq manna Avatangiisinut Aningaasaateqarfik nuna tamakkerlugu avatangiisit pillugit sulianut pissanganartunut tapiissuteqaqqissinnaammat. Avatangiisitsinnik paarsinissamut soqutiginninneq annertuvoq, aammalu nuannaarutigaara kommunit, suliffeqarfiit namminersortullu avatangiisini allannguinissamik kissaateqarmata. Ineriartornermut aammalu suliniutit avatangiisinut innuttaasunullu sunniutissaannut malinnaanissannut qilanaarpunga", Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Suliassat tapiiffigineqartut pingaarnerit tassaapput:

• Anartarfilerinermut imermullu errortuutikumut aaqqiissutissat
• Kommunini eqqagassanik isumaginninneq
• Aalisakkanut qassutinik/piniariartarfinnik isumaginninneq
• Innuttaasut suliffeqarfiillu avatangiisinut eqqumaffiginninnerulernissaat

Suliassat tapiiffigineqartut allattorsimaffiat uani takuuk

Avatangiisinut Aningaasaateqarfik sunaava?
Inatsisartut 2018-imi Avatangiisinut Aningaasaateqarfimmik, nuna tamakkerlugu avatangiisini pissutsinik pitsannguiniarluni sulianut tapersersuisussamik pilersitsiniarlutik aalajangerput. Ukiut tamaasa sulianut, avatangiisinut iluaqutaasussanut aningaasaliissutissanik immikkoortitsisoqartartussaavoq.

Annertunerusumik paasisaqarusunnermi attaveqarfissaq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Natuk Lund Olsen, tlf.: +299 346476, e-mail: natl@nanoq.gl