Inatsisartunut tunniussineq

Tallimanngornermi ullaap tungaani Inatsit Tunngaviusussaq pillugu Isumalioqatigiissitat isumaliutissiissutaat Inatsisartunut tunniunneqarpoq. Tamanna Ilimmarfimmi ingerlanneqarpoq.
Naalakkersuisut siulittaasuat Múte Bourup Egede oqalugiartunut ilaavoq, ilaatigullu ima oqarpoq: ”Aqqut takisimavoq, aqqutaanilu akimmiffissat arlallit aqqusaarneqartarsimapput. Taamaakkaluartorli aporfiit uniffiginagit ingerlariaqqittoqarsimavoq.
Suliaq Inatsisartunut ingerlateqqissinnaanngorparput – Inatsisartullu aqqutissaq nutaaq sumut siunnerfeqassanersoq aalajangerumaarpaat.

Naalakkersuisorlu assersuusiorpoq:

“Qulleq ikummarissarneqanngikkuni qamissaaq.
Ulu ipissarneqanngikkuni ikkiillissaaq.
Qajaq amerneqanngikkuni kivissaaq.
Qilaat katuaqanngikkuni inngertoqarsinnaanngilaq.

Tassa. Sulinikkut aatsaat alloriarnerup tullia piviusunngussaaq.

Asasakka inuiaqatigiit kalaallit – Asasakka Inatsisartut.
Sulilluarnissassinnik kissaappassi.