Nakkutilliisut umiarsuaraat ateqalerpoq Nanoq IV

Politiit umiarsuaararisimasaat Sisak IV Namminersorlutik Oqartussanit pisiarineqartoq Kalaallillu Nunaanni Aalisarsinnaanermut Akuersissutinik Nakkutilliisoqarfimmit (KANUAANA) februaarip 2-anni 2023-mi tunniunneqartoq, Nuup umiarsualiviani persuarsiorpalaartumik pisortatigoortumillu ullumi apriilip 26-anni 2023-mi atserneqarpoq, ateqalerluni Nanoq IV.

Inuit Nanoq IV atserneqarmat Naalakkersuisuni ilaasortat aamma umiarsuaaqqamut attuumassutillit najuupput.

Umiarsuaaqqamik atsiinermi ataqatigiissaarisoq tassaavoq Kalaallit Nunaanni Aalisarsinnaanermut Nakkutilliisoqarfimmi qanittukkut pisortanngortoq, Claus Nielsen.

Umiarsuaaqqamik atsiisoq tassaavoq Else Willumsen, KANUAANA-mi ukiorpassuarni atorfilik, soraarneq. Umiarsuaaqqamik atsiilernermini ima oqarpoq:

- Neriutigaara nunatta pisuussutaanik illit aamma siunissami serniginnillutillu paarsilluaqataajumaartutit. Iluunngarlunga kissaappagit isumannaatsumik pitsaasumillu umiartorumaartutit.

Nanoq IV, ativit pisussaaffilerpaatit, nanoq, inuttatit angalatillutit navialeqqunagit paarilluarlugillu nakkutigilluartassavatit. Maanna atserpagit: Nanoq IV.

Nanoq IV atserneqareermat Aalisarnermut Piniarnermullu Naalakkersuisoq Karl Tobiassen oqaaseqarpoq:

- Nuannaarutigaara Kalaallit Nunaanni Aalisarsinnaanermut Akuersissutinik Nakkutilliisoqarfik imartatsinnut naleqqulluinnartumik pertujaatsumillu angallateqalermat. Nanoq IV sisamanik aaliangersimasunik inuttaqassaaq.

Umiarsuaaqqap nunatta sineriaa tamakkingajallugu angallavigisinnaavaa; Nanortalimmit Upernavimmut, aamma Tunumi illoqarfik Tasiilaq angullugu angalasinnaalluni.

Angallat sinerissap qanittuani aalisarnermut, piniarnermut aallaaniarnermullu nakkutilliisunit nakkutilliisutut atorneqassaaq.
Nanoq IV sumiiffinni piffissanilu aalajangersimasuni immikkut ittumik atorneqartassaaq.

Soorlu aalisarluarfiup, piniarluarfiup aamma aallaaniarluarfiup nalaani nakkutilliinernut atorneqartassasoq, assersuutigalugu aavarnerup nalaani atorluarneqartassalluni.

Nanoq IV atortorissaaqigami allaffittut sumiluunniit atorneqarsinnaassaaq, soorlu nunatta immikkoortuisa ilaanni allaffittut atorneqarsinnaalluni. Sumiiffiit ilaannut pisariaqartitsineq naapertorlugu nuunneqarsinnaavoq.

Taamaalilluni sumiiffiit ilaanni sivisunerusumik nakkutilliisoqarsinnaalissaaq.
Neriuppunga Nanoq IV nakkutilliisutut siunissami atorluarneqartassasoq aamma atuisunit suleqataaffigineqarlunilu peqataaffigineqartassasoq.

Nanoq IV-mut paasissutissat:
Inuttat: 4
Takissusia: 24,14 meter
Silissusia: 6,32 meteri
Oqimaassusia: 139,4 bruttotonnage

Usitussusia: 41,8 nettotonnage
Motoriata sakkortussusia: 552 kW
Marlunnik aquuteralattalinnik gummibådeqarpoq
Ullukkut 12-inik ilaasoqarsinnaavoq

Annerusumik paasisaqarusukkuit unnga attavigissinnaavutit: gflk@nanoq.gl