Schweizimiut qaqqat sisoortarnerannut immikkut ilisimasallit suleqatigineqarnerat aallartinneqarpoq

Immap qaaniit 3200 meterisut qatsitsigisumi sumiiffimmut nunap qeriuaannartumut qajannartortalimmut takusaaneq

Kalaallit Nunaata aamma Schweiz-ip qaqqanik qajannartortalinnik, innuttaasunut kalluarneqartunut navianartorsiortitsisinnaasunik, unammilligassaqarneq ataatsimoorfigaat. Pingaartumik nunarsuup silallu kissatsikkiartorneranni nunap qeriuaannartup aakkiartulernera qaqqanillu aalajaakkunnaarsitsinera unammilligassaqartitsivoq.

Taamaattumik politikerit, atorfilittat immikkullu ilisimasallit Kalaallit Nunaanneersut angalaqatigiit, Aatsitassanut Inatsisillu Atuutsinneqarnerannut Naalakkersuisumit, Aqqaluaq B. Egede-mit aamma Avannaani Borgmesterimit, Palle Jeremiassen-imit siulersorneqarlutik Schweizimiut qaqqat sisoortarnerannut immikkut ilisimasallit tikeraarpaat.

Tikeraarnermi qaqqat sisoornissaannik navianartoqarneranut atatillugu akuutinneqartumik aarlerinaataasunik aqutsinissaq ukkatarineqarpoq. Pisussanut pilersaarummi ilaatinneqarput naalakkersuisunit marluusunit tamaginnit aallartitanik oqaloqateqarnerit, tulliutillugu sumiiffinnut qaqqap sisoornissaanik navianartorsiorfiusunut takusaaneq.

Schweizimi naalakkersuisut illoqarfiit pingaarnersaanni Bern-imi ataatsimeeqatigineqarnerisa nalaanni, schweizimiut naalagaaffimmi allatai, sinniisui aammalu schweizimiut naalagaaffeqatigiit avatangiisinut naalakkersuisoqarfiat, qaqqat sisoorneranni allanillu pinngortitami ajunaarnersuaqarnerani pitsaaliuinermut kiisalu ataatsimut katitikkamik aarlerinaataasunik aqutsinermut nunami namminermi akisussaasuusoq, peqatigalugit nunap marluusut akornanni suleqatigiinnissami soqutigisat oqallisigineqarput.

Aarlerinaataasunik aqutsineq qanoq suliaqarnermi atorneqartarnersoq, qaqqartooqarfimmi Alp-inut tamatuma kingorna tikeraarnerup takutippaa: Illoqarfiup Kandersteg-ip 1.300-it missaanik inoqartup qulaani qaqqat Spitze Stei alakkaamavoq, nunap qeriuaannartup aakkiartornerani qaqqaq qajannartortaqalersimasoq, illoqarfiup Kandersteg tungaanut ukiumut 8 meterinik nikeriarsimasarluni. Takorluukkami ajornerpaatut eqqarsaatigineqarsinnaasumi qaqqap sisoornerata Kandersteg-imi sumiiffiit najugaqarfigineqartut aserortussaavaa, taamaattumillu najukkami innuttaasunut navianartorsiortitsilluni. Tamanna tunngavigalugu qaqqat sisoortarnerannut immikkut ilisimasallit ilimasaarutinik, assigiinngitsunik malussaatilinnik, qaqqami qajannartortalimmi ingerlaavartumik alapernaarsuiffiusumik, pilersitsisimapput. Taamaattoqarnerani qaqqap sisoornissaa nalunaaquttap akunnerinik 24-it tikillugit sioqqullugu innuttaasut kalerrisaarneqarsinnaapput aammalu qimarngussorneqarsinnaallutik.

Sumiiffimmi takusaanerup nalaani aarlerinaataasunik aqutsinermut misilittakkat suleriaatsillu kiisalu ilimasaarutinik aamma kalerrisaarutinik pilersitsinissaq najukkani oqartussanut eqqartuiffigeqatigiiffigineqarput.

“Takusaanitsinni atortorissaarutit qanoq atorneqarnerat takuarput neriulluaatigaarpullu nammineerluta nunatsinni atortorissaarutinik assigusunik atuinissarput ingerlalluarsinnaajumaartoq”, Aqqaluaq Egede oqarpoq, nagipporlu ”Taamattaarlu attaveqarfigisartakkagut schweizimiunik qaqqat sisoortarnerannut immikkut ilisimasalinnik annertusitippagut aammalu Umiammakku Nunaanni aammalu Kangerluarsummi qaqqani qajannartortalinni kiisalu qaqqat sisoorneranni aarlerinaataasunut tunngatillugu siunissami unammilligassaasinnaasunut taakkua ilisimasaasa atornissaat qilanaaraarput,”, oqarpoq Aatsitassanut Inatsisillu Atuutsinneqarnerannut Naalakkersuisoq, Aqqaluaq B. Egede.

Qaqqaq qajannartortaqartoq ”Spitze Stei”, ilaatigut GNSS-stationimik, assip qeqqani takuneqarsinnaasumik, alapernaarsorneqartoq

Paasissutissanik annertunerusunik piniarnermut saaffissaq Jørgen T. Hammeken-Holm, naalakkersuisoqarfiup pisortaa (E-mail: joeh@nanoq.gl, tlf. nr. 34 68 46).