AtuartigukNaalakkersuisut arnarlunniarneq pillugu aaqqiagiinnginneq: Isumaqatigiittariaqarpusi aalisarneq aallartinniassammat
Nassiussisuuvoq: Naalakkersuisut Siulittaasuata Naalakkersuisoqarfia
Arnarlunniarneq sumiiffiit ilaanni aprilip aallaqqaataani aallartittussaangaluarpoq, KNAPK-li Royal Greenlandilu suli aaqqiissutissamik nassaanngimmata arnarlunniarneq uninngavoq. Taamaakkaluartorli arnarlunniarneq Paamiuni aallartereerpoq, Paamiuni aalisartut peqatigiiffiat Royal Greenlandilu tunisassiorsinnaanermik isumaqatigiissuteqarsimammata.
Naalakkersuisut siulittaasuat, Múte Bourup Egede: ”Illuatungeriit sukkanerpaamik aammaarluta aaqqiissutissamik nassaarniarnissaat kaammattuutigerusuppara, aalisarneq aallartinniassammat. Piffissamik sivitsuineq aalisartunut annertuumik kingunerlutsivoq, tamannalu akuerineqarsinnaanngilaq”.
”Naalakkersuisuniit isumaqatiginninniarnernut akulerunnissamik pilersaaruteqanngilagut, Naalakkersuisut kattuffiit illersornissaat pingaartimmassuk aammalu illuatungeriit namminneq aaqqiisinnaanissaat upperilluinnaratsigut. Nalunaarut pioreersoq misissussamaarparput imatut pisoqaqqinnginnissaa anguniarlugu. Aappassaammi taamatut pisoqarpoq taamaattumillu periuseq iluatsinngimmat nalunaarut qimerlooqqittariaqarparput. Piffissarli sivikeqimmat maannakkorpiaq tamanna pisinnaanngilaq”, Aalisarnermut Piniarnermullu Naalakkersuisoq Karl Tobiassen oqarpoq. Taasumallu neriorsuutigivaa suliap ingerlanneqarnera pingaartinneqarumaartoq.
Annertunerusumik paasisaqarusuttut Naalakkersuisut Siulittaasuata allattai saaffigisinnaavaat: allatsit@nanoq.gl