AtuartigukNipisanniarneq apriilip aallaqqaataani 2023-mi aallartissanngilaq
Nassiussisuuvoq: Aalisarnermut Piniarnermullu Naalakkersuisoqarfik
Nipisanniarneq pillugu nalunaarummi paragraf 8 naapertorlugu sumiiffinni aalisartut peqatigiiffii, kattuffii, aamma tunitsiviit aqutsiveqarfimminni nipisanniarnissap aallartinnissaa isumaqatigiissutigissavaat.
Aqutsiveqarfimmi aalisarnerup aallartinnissaanik kissaateqarlutik isumaqatigiissuteqartut Aalisarnermut Piniarnermullu Naalakkersuisoqarfimmut kingusinnerpaamik sapaatip akunneranik ataatsimik sioqqutsillutik ilisimatitsissutigisussaavaat.
Aalisarnermut Piniarnermullu Naalakkersuisoqarfik ukioq manna nipisanniarnerup apriilip aallaqqaataani aallartinnissaanut tunngasumik ilisimatitsissummik suli tigusaqanngilaq.
Taamaammat nipisanniarneq ukioq manna aqagu apriilip aallaqqaataani aallartinneqassanngilaq, tunisisoqarsinnaananilu pisisoqarsinnaanngilaq. Taakku aatsaat pisinnaalissapput Naalakkersuisoqarfik nalunaaruteqareerpat. Tamanna aamma sunngiffimmi aalisartunut atuuppoq.
Nipisanniarnermi piumasaqaatit maleruagassallu uani atuarneqarsinnaapput.
Annerusumik paasissutissanik perusuttoqarpat Aalisarnermut Piniarnermullu paasiniaasoqarsinnaavoq, apn@nanoq.gl-mut