Naalakkersuisoq Mimi Karlsen nunat avannarliit ministeriisa il.il. ataatsimiinneranni peqataanera

Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen ulluni kingullerni Islandimi isumakkut peqqissuseq pillugu nunat avannarliit ministerii kiisalu nunani avannarlerni qullersat ataatsimiinnerannut peqataavoq.

Ukiuni makkunani nunani avannarlerni assingusumik ajornartorsiuteqartoqartoq ersarippoq, tamatumani peqqinnissaqarfimmi unammilligassat aamma inuusuttut akornanni atugarliortoqarnera pineqarput. Nunanit avannarlerninngaanneersut ministerit 10-it peqqinnissaqarfimmi - aamma isumaginninnikkut susassaqarfiit ataaniittut, ullumikkut siunissamilu unammilligassat eqqartorpaat annertuumillu misilittakkanik avitseqatigiinnermi aamma suleqatigiinnerunermi periarfissaasinnaasut misissorneqarnissaat ukkatarineqarputtaaq.

Mimi Karlsenip ataatsimut ataatsimiinnginnermini, danskit Nunamut pissutsinut - aamma peqqissutsikkut ministeriat Sophie Løhde, kiisalu Islandimi peqqissutsikkut ministeriat Willum Þór Þórsson ataatsimeeqatigai.

Mimi Karlsen oqarpoq:

”Sophie Løhde ataatsimeeqatiginerani spiralilersuisimaneq pillugu suliaq tamatumalu saniatigut suleqatigiinnerunikkut peqqinnissaqarfik nukittorsarneqarnissaanut periarfissat eqqartorpagut. Ataatsimiinnerup malitseqartinneqarnissaanut siunnersuutigerusuppara ataatsimoortumik suleqatigiittussanik pilersitsisoqarnissaa, suleqatigiillu peqqinnissaqarfiup nukittorsarneqarnissaanut suleqatigiinnermut suliniutaasinnaasut ataatsimoorlutik ersarissassavaat.

Islandimi peqqissutsikkut ministeri Willum Þór Þórsson ataatsimeeqatiginerani isumaqatigiissutigaarput, atorfilittanik suleqatigiissitanik pilersitsisoqassasoq, taakkulu ataatsimoorlutik peqqissutsikkut annerusumik suleqatigiinnissamik periarfissaasinnaasut qulaajassavaat. Aasamut Islandimi peqqissutsikkut ministeri Willum Þór Þórsson Nunatsinni tikeraanerani suleqatigiinnissamut siunnersuutit ersarinnerusut eqqartoqqissavagut”, taama oqarpoq Naalakkersuisoq Mimi Karlsen nangillunilu; ”Islandi amerlasuutigut, pinngortitatigut, silap pissusiisigut aamma kulturitigut Nunatsinnut assinguvoq, qularinngilaralu suleqatigiinnerunikkut nunat akornanni iluaqutaasumik immitsinnut ilinniarfigisinnaalluta. ”

Ulluni tulliuttuni Mimi Karlsenip angalanini Danmarkimut nangissavaa sapaatillu akunnerata tulliani Regionsrådsformand Lars Gaardhøj peqqinnissaqarfimmi suleqatigiinneq pillugu ataatsimeeqatigissavaa, aammattaaq Isumaginninnikkut- aamma ineqarnikkut ministeri Pernille Rosenkrantz Theil susassaqarfiit assigiinngitsut akornanni suleqatigiinneq pillugu eqqartueqatigissallugu.

Attaveqaat: Meeqqanut, Inuusuttunut Ilaqutariinnullu Naalakkersuisoqarfimmi Naalakkersuisoqarfimmi naalakkersuisumut allatsi, Naja Lynge Petersen nalp@nanoq.gl