Nittartagaq naalakkersuisut.gl nutaaq saqqummerpoq

Nittartakkatigut saassussisoqarnerata kingorna naalakkersuisut.gl pisoqaq aasaq ammaqqinneqarsinnaanikuunngilaq, nittartakkap isumannaatsuunngitsumi ikiorsernertaqanngitsumilu pilersinneqarnikuunera pissutigalugu.

Taamaattumik utaqqiisaasumik nittartagaliortoqarnikuuvoq, paasissutissat pingaarnerit nittartakkamit pisoqqammeersut nuussorneqarnikuullutik.

Taamaammat ukiarmili immikkoortortaqarfiit naalakkersuisut.gl-imi pisoqqami imarisaatillit tamarmik imarisaatiminnik torersaanissartik, kiisalu nittartakkamut nutaamut nutaanik imarisaliornissartik isumagisassarinikuuaat.

Nittartakkami naalakkersuisut.gl-imi atortut nutaat
Naalakkersuisut.gl nutaaq isikkumigut allannguuteqarujussuanngilaq, taamaattumillu suli siulianut assigulluni.

Nittartakkami nutaami allannguut annerpaaq tassaavoq atoruminartuunissaanut atortorissaarutaa, pingaarnerpaasimavorlu paasissutissat naniuminartuunissaat.

Naalakkersuisut.gl-imi nutaami saqqummersitat, tusarniaanerit kiisalu ataatsimiinnernit imaqarniliat ataanniittut imarisat ujarsinnaavatit, ilaatigut uku toqqarnerisigut:

• Sammisaq
• Ukioq
• Suunera

Aamma Naalakkersuisut tamarmik immikkut pillugit paasissutissat, kiisalu kikkut allatsigineraat ”Naalakkersuisut” toorlugu maanna nassaarisinnaanngorpatit.

Naalakkersuisoqarfiit qupperneriniittut nutaat
Naalakkersuisoqarfiit aamma immikkut tamarmik qupperneqalernikuupput. Nittartakkallu siulianiit allaanerussutigisaanik maanna nittartakkami Naalakkersuisoqarfiit suliassaqarfii, qanorlu aaqqissuussaaneri assigiiaamik saqqummiunneqarput.

Naalakkersuisoqarfiup quppernerani nutaami uku nassaarisinnaavatit:

• Naalakkersuisoqarfiup aaqqissuussaaneranik takussutissiaq
• Immikkoortortaqarfiit tamarmik immikkut nassuiarneqarneri
• Kina Naalakkersuisoqarfimmi pisortaanersoq
• Naalakkersuisoqarfiup saqqummersitai

Atuffassissut Martha
Oqaasileriffiup atuffassissutaa Martha naalakkersuisut.gl-imi nutaami aamma atulerpoq, taassumalu nittartakkami allassimasut ilinnut atuarsinnaavai.

Nassitsisoq: Digitalimik Attaveqaqatigiinneq, Digitalimik Sullissinermut Aqutsisoqarfik.