Kunngeqarfiup Danmarkip NATO-mut aalajangersimasumik sinniisuutitaqarfiani kalaaleq siulleq

Naalakkersuisut kiisalu Nunanut Allanut Ministeriaqarfik kalaallimik atorfilittamik qaffasissumik Bruxellesimi Kunngeqarfiup Danmarkip NATO-mut aalajangersimasumik sinniisoqarfianut aallartitaqalerniarlutik isumaqatigiissuteqaqqammerput. Atorfilittaq taanna Nunanut Allanut Ministeriaqarfiup aallartitai allat peqatigalugit sinniisunut ilaassaaq taavalu Kunngeqarfiup isumannaallisaanikkut pingaartitaasa sulissutigineqarnerannut atatillugu Issittoq pillugu immikkut ilisimasaminik tunniussaqartassalluni.

Ruslandip Ukrainemut sakkulersornera pissutigalugu isumannaallisaanikkut pissutsinik Issittumut sunniuteqarsinnaasunik Kalaallit Nunaata annerusumik paasisimaqalernissaa pisariaqalersimavoq. NATO-mut sinniisuutitanut kalaallimik atorfilittamik ilaatitaqalerneq Illersoqatigiiffiup oqaluttuarisaanerani Issittumut tunngasunik ilisimasanik pisariaqartitsilerneq nalerorlugu pivoq, aammali NATO kiisalu Illersoqatigiiffiup nunarsuup ilaani tamaani inissisimanera pillugu Naalakkersuisut sukumiinerusumik paasisimasaqarnissaminnik pisariaqartitsinerata nalerorluarpaa.

”Kunngeqarfiup Danmarkip sinnera peqatigalugu Kalaallit Nunaat NATO-mut, ukiuni makkunani Avannaarsuanut isigiumaneqaleraluttuinnartumut, ilaasortaavoq. Pissutsit taama ilisimanerat ukiuni aggersuni Kalaallit Nunaanni Naalakkersuisunullu pingaaruteqarnerujartuinnassaaq. Taamaammat Avannaarsuani isumannaallisaanermut politikkimut, kiisalu NATO-p nunarsuup ilaanut tamaanga isiginninneranut Kalaallit Nunaata ilisimasaqarnerulernissaa pingaaruteqarpoq. Aammattaaq nunani eqqaamioriinni uagutsinni pissutsit immikkut ittut inuiaqatigiiusugullu pilluta NATO paasisimasaqarnerulernissaa pingaaruteqarpoq, kiisalu soqutigisatsinnik, naleqartitatsinnik pingaarnerutitatsinnillu ilisimasaqarnissaa pingaaruteqarluni.” – Nunanut Allanut, Inuussutissarsiornermut Niuernermullu Naalakkersuisoq, Vivian Motzfeldt.

Siunnersortaaneq Lida Skifte Lennert tassaassaaq Kunngeqarfiup Danmarkip NATO-mut aalajangersimasumik sinniisuutitaqarfiani Naalakkersuisut aallartitarisassaat. Kalaallit aallartitap misilittagartuujunissaa Naalakkersuisunit qularnaarusunneqarsimavoq taannami issittumut tunngasunik NATO-mi paasinnilluartoqarnissaanut peqataasussaavoq kiisalu Kunngeqarfiup soqutigisaminik sulissuteqarneranik tamarmiusumik nukittorsaaqataassalluni. Lida Kunngeqarfiup Danmarkip NATO-mut aalajangersimasumik sinniisuutitaqarfianut Naalakkersuisut aallartitaanni siullersaassaaq. Lida Naalakkersuisut ataanni qitiusumik allaffeqarfimmi sulinermik ukiut 25 missarpiaanni misilittagaqarpoq, tassa fuldmægtigiusimalluni, immikkut siunnersortaasimalluni, allaffimmi pisortaasimalluni, aallartitaqarfimmi allattaasimalluni kiisalu sinniisoqarfimmi pisortaasimalluni.
Sinniisuutitaqarfimmi pisortatut ukiuni 14-ini misilittagaqarpoq, tassaniinnerminilu Kalaallit Nunaata nunat tamalaat akornanni attaviinik kissaataanillu paasisimasaqalersitsisimalluni. Tamatuma saniatigut Lida tunngaviusumik inatsisiliornermut ilaasortassatut Naalakkersuisunit toqqagaasimavoq. Tamatuma saniatigut Lida Nunanut Allanut Ministeriaqarfiup Isumallisaanermut Politikkikkut Allaffiani sivisunngitsumik suliartortitaasimavoq Kunngeqarfiup NATO-mi soqutigisaminik sulissuteqarneranik ataqatigiissaarisuutitaasimalluni.

”Atorfik assorsuaq soqutiginarpoq assoroornartoqassallunilu. Isumannaallisaanikkut politikkimut tunngasutigut suleqataalernissara qilanaareqaara. Tamatumani nunatsinni avataanilu misilittakkakka atorluarsinnaassavakka. Annermilli Kunngeqarfiup Danmarkip NATO-mut aalajangersimasumik sinniisuutitaqarfiani kalaallit nipaat nutaartaassaaq, aammali kunngeqarfiup issittoq eqqarsaatigalugu NATO-mi pingaarnerutitaanik sulissuteqarneranut nukittorsaataassalluni.” Siunnersortaaneq Lida S. Lennert

Attavissaq: Naalakkersuisup allattaa Naasunnguaq Beck Kristensen, E-mail: nabk@nanoq.gl