Center for Cybersikkerhedip Kalaallit Nunaanni nittartakkatigut saassunneqarsinnaaneq nalilersuiffigaa

Kalaallit Nunaanni tunngaviusumik nittartakkatigut sillimaniarneq pillugu inatsit 2020-mi atortuulersinneqarmalli, centerimi siunnersuiniarlutik sulisut Kalaallit Nunaanni oqartussaqarfiit qanimut suleqatiginerulersimavaat. Maannalu Center for Cybersikkerhed (CFCS)-imit Kalaallit Nunaanni nittartakkatigut saassunneqarsinnaanermut nalilersuinermit nalunaarusiaq siullermeerluni saqqummersinneqarpoq.

”Kalaallit Nunaat issittoqarfimmi qitiulluinnarluni inissisimavoq. Taamaattumik nittartakkatigut isertorluni alapernaarsuinissamut navianaat ajoraluartumik ilimanaateqarpoq. Nunat, Rusland aamma Kina, issittoqarfimmi niuernermi periarfissaminnik soqutigisaminnillu pitsanngorsaaniarlutik Kalaallit Nunaannut ajoqutaasinnaasumik isertorlutik alapernaasersorsinnaapput. Taamaattumik nuannaarutigeqaara maanna Kalaallit Nunaanni pisortaqarfiit Center for Cybersikkerhed qanimut suleqatigineqalersimammat. Navianaat piviusuuvoq, Kalaallit Nunaannullu navianaat pineqartoq naalagaaffeqatigiinnermut aamma navianaataavoq. Centerip navianaataasinnaasunik nalilersuinerata takutippaa siunissami suliassaqarfiit pillugit pingaarutilimmik suleqatigiiffissaqartugut,” taama oqarpoq illersornissamut ministeri, Troels Lund Poulsen.

”Geopolitiskimik issittoqarfimmut soqutigisaqarneruleriartorneq Kalaallit Nunaanni assigiinngitsorpassuartigut sunniuteqarpoq – nunallu assinganut aamma ilanngunneqarluta. Nittartakkatigut saassunneqarneq uani aamma ilaavoq. Ukiuni kingullerni Kalaallit Nunaanni nittartakkatigut saassussinerit amerliartorput – nittartakkatigut isertorluni alapernaarsuinerit aammalu pinerlunniarnerit nalaanneqarnikuupput. Tamaattumik navianaateqarsinnaasunut nalilersuinerit Kalaallit Nunaanni nittartakkatigut saassunneqarsinnaanermut pinaveersaartitsiniarnitsinnut pingaaruteqarput,” Naalakkersuisut Siulittaasuat, Múte B. Egede taama oqarpoq.

Center for Cybersikkerhedip nalilersuineri aallaavigalugit Kalaallit Nunaanni nittartakkatigut isertorluni alapernaarsuisoqarsinnaanera ilimanaateqarluinnarpoq. Nunat, Rusland aamma Kina issittoqarfimmut soqutiginnilluinnartuupput. Rusland issittoqarfimmi siuttutut imminut isigivoq, oqaluttuarisaanerlu qiviassagaanni issittoqarfimmi pingaarutilittut aamma inissisimallutik. Kina issittoqarfimmi sunniuteqarnerorusuppoq, ilaatigut aatsitassanik pissarsinissamut kiisalu imaatigut assartuinermut tunngatillugu.

Kalaallit Nunaata nittartakkatigut pinerluffigineqarnissaa aamma ilimanaateqartorujussuuvoq. Tassani ingammik ransomwaremik taasagaannik saassussisoqarneratigut Kalaallit Nunaanni pisortaqarfiit suliffeqarfiillu eqqugaasinnaapput, taamaattoqarneratigullu Kalaallit Nunaanni atorfiit inuiaqatigiinnut pingaarutillit aamma eqqugaasinnaapput.

Tassunga ilaatigut peqqutaavoq Issittoqarfik, Kalaallit Nunaat ilanngullugu, nunap assingani inissisimanertik aallaavigalugu inuussutissanik, inaallagissamik kiassarnermillu pilersorneqarnissaminnik pisariaqartitsilluinnartuusut. Nittartakkatigut saassussinerit pisortat suliffeqarfiutaannut pisortallu suliffeqarfiutiginngisaannut annertoorujussuarmik innarliisinnaavoq.

Nittartakkatigut isertorluni alapernaarsuisoqarsinnaanerata aammalu nittartakkatigut pinerlunniarnerup saniatigut Kalaallit Nunaanni nittartakkatigut ajortisaariniarluni saassussisoqarnissaanut aammalu isummanik aalajangersimasunik siaruarterinissaq siunertaralugu nittartakkatigut saassussisoqarsinnaanera ilimanaateqarpallaanngilaq. Nunat NATO-mut ilaasortaasut russit nittartakkatigut isummanik aalajangersimasunik siaruarterinissaq siunertaralugu saassussisartut, Ukrainemi sorsuttoqarnerata kingunerisaanik Danmarkimut saassussisinnaanerannut navianaat qaffariaateqarnikuuvoq. Taamaakkaluartoq taamatut saassussisinnaanerup navianaataataa qaffariarneratut annertutigisumik navianaateqartoqarnissaa Kalaallit Nunaannut ilimananngilaq.

Navianaataasinnaasut nalilersorneqarneri ugguuna atuakkit: Kalaallit Nunaanni nittartakkatigut saassunneqarsinnaanermut nalilersuineq

Sukumiinerusumik paasissutissanik pissarsiniaraanni attavissaq:

Digitalimik Sullissinermut Aqutsisoqarfik
Aqutsisoqarfimmi pisortaq Katrine H. Nathanielsen digitalisering@nanoq.gl immaqaluunniit oqarasuaat 34 59 70

Center for Cybersikkerhed FE-p tusagassiutinut sullissivia aqqutigalugu: FEkommunikation@fe-ddis.dk immaqaluunniit oqarasuaat: +45 2016 0593