Maanna siunissamilu kulturikkut kingornussat tigussaanngitsut

Qulequtarineqarluni: ” Kingornuttakkat tigussaanngitsut uagutsinnut isumaat aamma uagut kingornuttakkanut tigussaanngitsunut isumarput" taama atserlugu Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter P Olsenip ulluni 15 aamma 16 marts 2023 attuumassuteqartut, kulturimik suliallit, kommunit politikerillu kulturikkut kingornussat tigussaanngitsut pillugit suliaqarnerup nukittorsarneqarnissaa tunngavigalugu isumasioqatigiinnissamut qaaqquai.

Isumasioqatigiinneq ullut marluk ingerlanneqassaaq peqataasut saqqummiussisussallu 70 missaanniittut tamatuminnga tunngavileeqataassallutik, tamannalu Hotel Hans Egedemi Nuummi ingerlanneqassalluni. Kultureqarneq pillugu isumasioqatigiinneq siulleq november 2022-mi ingerlanneqarmat pingaarnertut sammineqarput eqqumiitsuliat. Isumasioqatigiinnermi uani ukkatarineqassapput kulturikkut kingornussat tigussaanngitsut, aamma taaneqartarput kulturikkut kingornussat uumassusillit.

2009-mi Kalaallit Nunaat UNESCO-mi kulturikkut kingornussat tigussaanngitsut pillugit isumaqatigiissummut ilannguppoq, aammalu kingornuttakkat tigussanngitsut pillugit suliaqarneq ukiuni arlalinni politikikkut suliarineqarsimavoq.
Tamannalu inatsisitigut suliniuteqarnernik kinguneqarsimavoq, assersuutigalugu aalajangersimasunik suliaqarnernik kinguneqarluni.

Kulturikkut ingerlataqartut allallu soqutiginittut ullut marluk ingerlanerani kulturikkut kingornussat tigussaanngitsut qanoq pitsaanerpaamik qulakkeerneqarsinnaanerat pillugu eqqartueqatigiinnissamut katersuunnissaat Naalakkersuisut qilanaaraat. Eqqartueqatiginnermi tunngavigineqassapput atortussat assigiinngitsut ileqquusumik assassornermi suliarineqartartut inuiattullu suleriutsit, assersuutigalugu qimussernermik kultureqarneq, nerisassiornermik kultureqarneq, qajartortarnermik kultureqarneq il.il.

”Pingaaruteqarpoq kulturikkut kingornussat tigussaanngitsut pigiinnarneqarnissaasa ukkatarineqarnerunissaat, tassami ileqquusut inuit ingerlatariunnaassappatigit nutaanngorsaanerup annertusiartortup, nunasuarmioqataanerulernerup, illoqarfiit akornanni nuttarnerup, silaannaap allanngoriartornerata il.il. kingunerisaanik kulturikkut kingornussat tigussaanngitsut ilaasa tammariartornissaat aarlerinarmat. Kulturitsinnik ilisimanninneq inuttut ataasiakkaatut aamma ataatsimoortarnernut pingaaruteqartuuvoq. Taamaattumik neriuutigaara isumasioqatigiinneq kulturikkut kingornussatta tigussaanngitsut pillugit suliaqarnermik ingerlatitseqataassasoq, taamaaliornikkullu qulakkeerinneqataassalluni. ”Taama oqarpoq. Naalakkersuisoq Peter P. Olsen.

Qarasaasiaq atorlugu Naalakkersuisut facebookiatigut aamma KNR 2-kkut isumasioqatigiinnermi malinnaanissamut periarfissaqassaaq.

Annertunerusumik paasisaqarusunnermi saaffigineqarsinnaavoq Line Hasselriis, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik, Toqq.: 34 57 08
LAND@nanoq.gl

Pilersaarut: Isumasioqatigiinneq –Kulturikkut kingornussat tigussaanngitsut