Aningaasaqarnermut Naligiissitaanermullu Naalakkersuisoqarfik

Marsip aallaqqaataa upernaap ulluisa siullersariinnanngilaat, aammali FN-ip nunarsuaq tamakkerlugu assigiinngisitsinermik akiuiniarnermut ulloritippaa. Ullup taassuma malunnartinnissaa ajoraluartumik suli pisariaqarpoq.

Piffissami tamat oqartussaanerannik eqqarsariaatsip pisinnaatitaaffiillu sorsuutigalugit angusimasat aarlerinartorsiortinneqarfiini, pingaartitat ataatsimoortitsilluartartut inuiaqatigiinnillu naligiinnik pilersitsisartut pisariaqarput.

Naalakkersuisut inuit tamarmik, kingoqqiffii, suiaassusaat, innarluuteqarnerat, atoqatigeeriaasiat, politikikkut isiginnittaasiat, upperisaat allallu apeqqutaatinnagit naligiissinneqarnissaat pingaartippaat. Tamatta assigiissanngilagut, assigiimmilli pineqassaagut. Assigiinngissutsit avissaartuutsissanngilaatigut. Assigiinngissutsit pisuujunerulersillutalu assigiinngisitaartitsisarput.

Assigiinngisitsineq assigiinngitsorujussuusarpoq. Inuk aalajangersimasoq kanngusaarneqartoq, immikkoortinneqartoq nikanarsarneqartorluunniit eqqorsinnaavaa, innuttaaqatigiillu aalajangersimasut aamma eqqorsinnaallugit. Assigiinngisinneqarneq nukissaarunnermik, allanit nikanarnerunermik kamammillu pilersitsisarpoq. Nunatut immikkoortinneqarnerit akuersaarneqarsinnaanngitsut oqaluttuarisaanitsinni misigisimavavut. Assigiinngisinneqarneq taanna tamatta oqaluttuarisaanitsinnut akuusoq, kinguaarinni arlalinni pitsaanngitsumik uatsinnut sunniivoq. Ullumikkut oqaatsit oqariartaatsillu assigiinngisitsinermik tikkuussisinnaanngortitsillutillu akiuisinnaanngortitsisut atulersimavavut, anguniagarpulli tamakkerlugu suli angunngilarput.

Ukiuni makkunani uumissuisumik oqaluttarnerup (hate-speech) akiornissaa pingaarutilimmik suliassaqarfigaarput. Ajoraluartumik nunatsinni innuttaasut taama iliorfigineqartarnerat misigisarparput. Suaarfigitinnerit, pimmattaannerit ilami allaat persuttaanerit inoqatinut allatut atoqatigeeriaasilinnut, allaanerusumik sumiorpaluuteqartunut, allatut isikkoqartunut arlaatigulluunniit amerlanerussuteqartunit allaanerusunut atorneqartarput. Internetsimi tamanna oqaaseqartarfinni takusarparput. Tamanna qanorluunniit iluseqaraluarpat akuersaarneqarsinnaanngilaq, ataatsimuussutsitsinnullu innarliivoq.

Uumissuisumik oqaluttarnermut ersoqatigiinneq akiuussutaavoq. Uumissuisumik oqaluttumik naammattuuigaangatta taamaaliornermut akuersaannginnerput paasitittassavarput, taamaaliornitsigummi eqqugaasumut ersoqatigiinnissaagut. Ersoqatigiinneq sapiiffigisariaqarpoq, tamattali ersoqatigiinnilaarutta, tamatta annertoorujussuarmik angusaqassaagut. Immikkoortinneqartunik illersuisartutut isigineqassaagut, uumissuisumik oqalunnerit nalunaarutigisarlugit, avissaartuutsitsisumillu oqalunnerit pissusilersornerillu akuersaassanngilagut. Ullumi ulloq immitsinnut qiviarnermut atortigu, qanorlu inuttut ataasiakkaatut, suliffeqarfittut atorfeqarfittullu iliornitsigut assigiinngisitsinermik unitsitsisinnaanermut eqqarsaatersorfigalugu. Akuersaaqatigiinnermik sorsuutiginninnermi tamatta pingaaruteqarpugut. Qanoq sumilu inunngornissarput nammineerluta aalajangerneq ajorparput, allanulli qanoq pissuseqarnerput nammineerluta aalajangersinnaavarput.

/Aningaasaqarnermut Naligiissitaanermullu Naalakkersuisoq Naaja H. Nathanielsen.


Attavissaq: Ivalu Nørreslet Rex (Aningaasaqarnermut Naalakkersuisoqarfik) Toqq: 346684 irex@nanoq.gl