Hans Rafaelsenimut eqqaaniut

Nunarput inummik annertuumik sisoraatinik ujakkaarnermi timersornermi namminerlu kajumissuseq aallaavigalugu suliaqarnermik sunniuteqarnikooqisumik annaasaqarpoq.

Hans Rafaelsen 9. Juli 1953-imi Nivaami inunngorsimasoq, 69-inik ukioqarluni januaarip 30-ani 2023-mi toqukkut qimaguppoq.

Hans Rafaelsen nulianilu Karen Mina sisoraatinik ujakkaarnermi nammineq kajumissutsiminnik siuarsaasuupput sunniuteqataanerpaanikuullutillu, pingaarnertut Aasianni sisorartartut peqatigiiffianni ASP-mi. Hansi ukiut 50-it sinnerlugit sisoraatinik ujakkaartartuusimavoq aammalu ukiuni 50-ingajanni Kalaallit Nunaanni nammineq kajummissutsiminnik suliaqartuni malunnaataanerpaasimavoq, inuusuttunut timersornikkullu siuarsaasuunermini sunniuteqangaatsiarnikuulluni. Hansi sisoraatinik ujakkaartarnermini timersortarnerminilu siuarsaasuunermini timersornermik kivitseqataasuuvoq annertuumillu maligassiuisuulluni. Sisoraatinik ujakkaartartorpassuit tunngavilersortarsimavai tamannalu takussutissartarivaa ASP-mi sisoraatinik ujakkaartartut nunatsinni qaffasissumik inissisimanerannut allaallumi sineriammut siaruaannikuupput aammalumi nunanut allanut.

Hansip inuttut ilisimaneqaatigaa kikkunnit tamanit inissaqartitsisoq, qiimasoq, kaammattuisoq, anguniagaqallaqqissoq ataatsimoortitsillaqqissorlu. Timersornerup silarsuaanni oqariartuuteqallaqqissutut ilisimaneqarpoq sunniuteqangaatsiartartunik, inuusuttunullu inooriaatsinik naleqartitanillu ilusilersueqataangaatsiarnikuulluni. Hansip ASP-imi ilaasortanut oqariartuutigisarsimasaata ilagisimavaa, angusarissaartoqarpat tamarmik nuannaarutigissagaat, angusarissaarneranullu ilaasortat tamarmik pisooqataasut aammalu ataatsimoornikkut ikioqatigiinnikkullu pikkorissunik pilersitsisoqarsinnaasoq.

Hansi ataasiaannarnani Kalaallit Nunaanni timersornikkut kajumissutsiminillu sulinerminik nersorneqartarpoq, ilaatigut 2011-mi Faxe-legat ukiuni 40-ni tunniunneqartuni annerpaasoq timersullammattut nersornaat pissarsiarisimavaa. Aammalu Hansi nulianilu Karen Mina Maligassiuisut Show 22. oktober 2022 ingerlanneqarnerani nersorniarneqarlutik Kalaallit Nunaanni Timersoqatigiit Kattuffianni siulersuisuni ilaasortap Bernhardt Olsenip oqaaseqarfigai.

Hansip nulia, pania ernutai qanigisaalu tamaasa misiginneqatigaakka.

Eqqaaneqarnera ataqqinartuuli.

Peter Olsen
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq