Atuartiguk2023-mi Nunat Avannarliit Siunnersuisooqatigiivisa Avatangiisinut nersornaasiuttagaannut piukkussarnik siunnersuuteqarit
Inummik imaluunniit suliffeqarfimmik piujuartitsiviusumik annoraaminernik tunisassiornissamut atuinissamullu suliniuteqartumik nalunngisaqarpit? Maannakkut piukkussarnik 2023-mi Nunat Avannarliit Siunnersuisooqatigiivisa Avatangiisinut nersornaasiuttagaannut siunnersuuteqarsinnaanngorputit.
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Nunat Avannarliit Siunnersuisooqatigiivisa Avatangiisinut nersornaasiuttagaannut ukioq manna qulequtarineqarpoq piujuartitsiviusumik annoraaminernik tunisassiorneq atuinerlu.
Piujuartitsiviusumik atisaliortarneq aammalu atisat atorneqartarneranni periaatsit nunarsuarmi piujuartitsiviusumik ineriartortitsiviusussat pisariaqartippagut.
Annoraaminernik tunisassiorneq nunarsuarmi imermik tarajoqanngitsumik atuinerup 4 procenteraa, suliffissuit kuldioxidinik (CO2) aniatitsinerisa 10 procenteralugu, pesticid-inik atuinerup 16 procenteralugu, nunarsuarmi imikoorutinik kuutsitsinerit 20 procenteralugu aammalu imaani mikroplastit 35 procenteralugu. Imermik atuinerujussuaq aammalu eqqagassat annertoorujussuit, annoraaminernik suliffissuaqarnerup siuarsarneratigut tamanut iluaqutaasussamik qanoq allanngortinneqarsinnaappat?
Nunat Avannarliit Siunnersuisooqatigiivisa Avatangiisinut nersornaasiuttagaat ukiut tamaasa nunani avannarlerni kattuffimmut, suliffeqarfimmut imaluunniit inummut avatangiisinut immikkut ittumik suliniuteqarsimasumut tunniunneqartarpoq.
300.000 koruuninik akimarpalaartumik nersornaasiinissamut piukkussarnik siunnersuuteqarnissamut maannakkut illit periarfissaqarputit. Nersornaatisisoq aaqqiissutissamini Kalaallit Nunaannut imaluunniit nunanut avannarlernut tunngatitsissaaq aammalu ingerlatani pingaarnerit Nunani Avannarlerni ingerlatissallugit.
Ukioq manna nersornaat pillugu annertunerusut atuakkit aammalu piukkussat siunnersuutigalugu uani:
2023-mi Nunat Avannarliit Siunnersuisooqatigiivisa Avatangiisinut nersornaasiuttagaannut piukkussarnik inassuteqarit
Piukkussanik siunnersuuteqarnissamut killigitinneqarpoq ulloq 9. maj 2023
Attaveqarfissanut paasissutissat
Paasissutissanik annertunerusunik piniarnermi, takuuk www.norden.org imaluunniit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik attaveqarfigiuk uani e-mail: pan@nanoq.gl