AtuartigukSiulersuisut Ilulissani katersuutissapput
Nassiussisuuvoq: Naalakkersuisut Siulittaasuata Naalakkersuisoqarfia
Namminersorlutik Oqartussat ingerlatseqatigiiffiini siulersuisut ilaatigut suleqatigiinneq, ineriartorneq siuarsaanerlu eqqartorniarlugit sapaatip akunnerani matumani naapissapput.
Siulersuisuni ilaasortat politikerillu 100-t missaanniittut isumasioqatigiinnermi, Naalakkersuisut Siulittaasuanit Múte Bourup Egedemit aallarnerneqartussami peqataassapput.
”Siulersuisut naapinnissaannut qilanaarpunga, taakkuuppummi inuiaqatigiinni pingaarutilinnik suliaqartuusut. Inuiaqatigiinnitsinni ukiuni tulliuttuni annertuumik allanngortoqartussaavoq, Nunattalu siunissaa pillugu suleqatigiinnissarput, peqatigiillutalu siunnerfiliinissarput pingaaruteqarpoq”, Múte Bourup Egede oqarpoq.
Namminersorlutik Oqartussat ingerlatseqatigiiffiini 2016-miit 2021-mut siulittaasut 50 procentii nunatsinneersuupput 2022-milu 85 procentimut qaffassimalluni.
Piffimmi tassani siulersuisuni ilaasortat 55 procentii nunatsinneersuupput 2022-milu 74 procentiulluni.
”Pitsaasunik nukittuunillu siulersuisoqarpugut, ingerlatseqatigiiffinnilu assigiinngitsuni siulersuisunik katiterisarneq siunnerfigisatsitut ingerlalluni. Avataaneersunik, maanilu nunatsinneersunik piukkunnaateqartunik siulersuisuni ilaasortaatitaqarpugut, tamannalu Naalakkersuisuni iluarisimaarparput. Siulersuisuni siulittaasut nunatsinneersut ullumikkut aqqaniliupput, marlullu nunanit allaneersuullutik, tamannalu pissusissamisoorpoq, Múte Bourup Egede oqarpoq.”