AtuartigukEU-mi Issittoq Pillugu Oqalliffk aammalu Nunap Inuiisa oqaloqatigiiffiat 8.-9. februar 2023
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Naalakkersuisut EU Kommission suleqatigalugu Issittoq Pillugu Oqalliffik aammalu Nunap Inuiisa Oqaloqatigiiffiat Katuami ulluni marlunni aaqqissuutissavaat.
Una pisussaq EU-p ukiumoortumik Issittoq nunallu inuii pillugit aaqqissuuttagaa angisooq Bruxellesimi nunanilu issittoqarfiusuni paarlakaajaallugit ingerlanneqartarpoq. Aaqqissuussaq siullermeerluni Kalaallit Nunaanni ingerlanneqassaaq, EU-miit Issittoqarfinniillu inuit 200 sinnillit peqataanissaat naatsorsuutgineqarpoq.
Oqallinneq Naalakkersuisut Siulittaasuanit Múte Bourup Egedemit aammalu Avatangiisunut, Imarpinnut Aalisarnermullu Kommisærimit Virginijus SinkeviÄius-mit ammarneqassaaq, issittumilu suleqatigiinnermi nunanut allanut ministerit qaffasissumilu atorfillit arlallit Nuummut tikissapput qulequttallu arlallit oqaluuseralugit.
Oqallinnerup immikkoortuani siullermi kingullertigut pisut, suleqatigiinneq Issittumilu unammillernartut oqaluuserineqassapput, immikkoortullu aappaani issittumi nunap inuiinut tunngasut oqaluuserineqassallutik.
Oqalliffimmi assigiinngitsunik qulequtaqarluni oqalliffeqartassaaq, ilaatigut nunarsuarmioqatigiinni suleqatigiinneq, issittumi suleqatigiinneq, silap pissusaata allannoriartornerata unammillernartui, ilisimatusarneq, nutaaliorneq allarpassuillu eqqartorneqassallutik.
Oqalliffiup ingerlanneqarneranut atatillugu Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt Kommissær SinkeviÄius-mik, Danmarkip Nunanut Allanut Ministerianik Lars Løkke Rasmussenimik, Savalimmiut Nunanut Allanut, Inuussutissarsiornermut Niuernermullu Lagmandiannik Høgni Hoydalimik, Nunap Inuiinut FN-ip Immikkut Nalunaarusiortuanik, ambassadørinik allanillu ataatsimeeqateqassaaq.
Vivian Motzfeldt ima oqaaseqarpoq: ”EU-p Issittumi Oqalliffiata Kalaallit Nunaanni ingerlanneqarnissaata takutikkaa Kalaallit Nunaata EU-llu akornanni pitsaasumik suleqatigiittoqartoq. Oqallinnerup periarfissippaatigut EU-mi allaniillu aalajangiisartutut aallartitaasut ataatsimeeqatiginissaanut. Piffissami matumani nunarsuatsinni najummassimanartorsiortoqarnerani tamanna pingaaruteqarpoq.”
Pisussanut pilersaarutit nittartakkamut innersuussut (link) una toorugu takuneqarsinnaapput
Nuummi ullumi pisoqarfiulluartussami Naalakkersuisut tikilluaqqusinissaminnut qilanaarput.