Peter Olsenip neriuutigaa siunissami Arctic Winter Gamesini ilaasut amerlanerulernissaat

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen kalaallit Artic Winter Gamesimi aallartitaat ilagalugit Fort McMurrayimi, Albertami, Canadamiittumi ilagai, maannamullu kalaallit angusaat kusanartut nuannaarutigalugit. Naalakkersuisup timersuutinik arlalinnik kalaallit unammiuaartut tapersersorlugit isiginnaartarpai.

Arctic Winter Games International Committee politikikkikkullu nunat ilaatitaqartut siuttuttui Fort Mcmurray-imi ataasinngornermi ullaakkut ataatsimiipput. Ataatsimiinnermi ilaatigut Issittumi timersuutinik siunissami unammiuaartitsisarnissat eqqartorneqarneranni Peter Olsenip tikkuarpaa Arctic Winter Games-ertoqartarnera ilaasunut ataasiakkaanut qanigisaanullu sunniuteqarluartarnera. Kalaallit Nunaat sinnerlugu nunani allani takutitsisarneq akisussaaffimmik imaannaanngitsumik pissusissamillu malinnaalluarsinnaanermik piumasaqaataaffiuvoq, taamaammaallu inuusuttut ukunani pissuserissaarnissat ilinniarsinnaanerannut periarfissinneqarput.

Naalakkersuisup unammiuaartarnerit ukiuni arlalinni malunnaavigisarsimavai, ilaasunilu nuannaarutaallunilu qiimmattaasarnera takujuartarsimavaa, peqataanerlu imminut tatiginerulernermik pilersitsisuusartoq qularutiginagu, taamaammallu inuusuttut ineriartornerannut iluaqutaalluarsinnaalluni. Peter Olsenip ajoraluartumik ukioq manna maluginiarpaa unammiuaarnerni Kalaallit peqqataasut siornatigornit ikinnerunerat, taamaammallu Naalakkersuisup siunissami Arctic Winter Gamesini peqataasut amerlanerulernissaat neriuutigaa:

Kalaallit Nunaata ilaatitaat siornatigornit ikinnerusut maluginiarlugu.

- Malugaara Kalaallit Nunaata Arctic Winter Games 2023-imi ilaatitai siornatigut unammiuaartarnernit ikinnerusut. Neriuutigaara nunatsinni timersoqatigiit peqatigiiffiisa nunatsinniittut ilaatitaat siunissami aggersumi amerliumaaraat, Naalakkersuisoq taaama oqarpoq.

- Timersornikkut kulturikkullu ingerlataqartarnerit nuannaarutaasarput, peqqissuunermik aallartitsisarlutik, ilikkagaqarfiusarput kiisalu nunaqqatinik imaluunnit nunanik tamalaanik peqateqarnermik misigisitsisarlutik. Tulluusimaarutigaara inuusuttut Arctic Winter Games aqqutigalugu misilittagaqarnissaannik periarfissitsikkatigit, taama oqarpoq Peter Olsen Arctic Winter Games International

Committee nunallu allat politikkikkut aqquttuinik ataatsimeeqateqarnermi.

Naalakkersuisup Peter Olsenip Kalaallit Nunaata Timersoqatigiiffiata Kattuffiani siulittaasoq Nuka Kleemann marlunngornermi ilisimatitseqatigiinnertalimmik ataatsimeqatigaa. Tassani Naalakkersuisup aamma eqqaavaa Arctic Winter Gamesimi kalaallit peqataatitaasa amerlassusaat pillugit eqqarsaatersuutini.

Timersortartut 65-t Kalaallit Nunaanneersut Arctic Winter Games 2023imut ilaapput.

Annertunerusumik paasisaqarusukkaanni attavissaq: Naalakkersuisup allattaa Rosa Thorsen, mobiltlf.: +29955303 rose@nanoq.gl