Savalimmiut siulittaasuutitaqareermata Kalaallit Nunaat siulittaasuutitaqartussanngorpoq

2022-mi Savalimmiut nunanut allanut, sillimaniarnermut illersornissamullu tunngatillugu politikkeqarnermi attaveqaatitut ataatsimiititaliami siulittaasuutitaqareersullu lagmandip Aksel V. Johannesenip Kalaallit Nunaata siulittaasuutitaqalernera Múte B. Egedemut ullumi tunniuppaa.

Nunanut allanut, sillimaniarnermut illersornissamullu tunngatillugu politikkeqarnermi attaveqaatitut ataatsimiititaliaq Savalimmiuni, Danmarkimi Kalaallit Nunaannilu politikkikkut siuttuusunit juunip qaammataani 2021-mi pilersinneqarpoq. Nunanut allanut, sillimaniarnermut illersornissamullu tunngatillugu politikkeqarnermi ataatsimut soqutigisat nukittorsarneqarnissaat anguniagaalluni kiisalu Savalimmiut Kalaallit Nunaallu nunanut allanut, sillimaniarnermut illersornissamullu tunngatillugu periarfittunerunissaat anguniagaalluni.

”Attaveqaatitut ataatsimiititaliap nanginneqarnissaa isumalluarfigaara, tamanna Kalaallit Nunaannut ineriartornikkut amerlanerusunik periarfissaqalersitsisuummat. Nunanut allanut, sillimaniarnermut illersornissamullu tunngatillugu politikkeqarnermi akisussaaffeqarneq silarsuarmioqativut eqqarsaatigalugit piffissami nalorninartoqarfiusumi uatsinnut pingaaruteqaqaaq. Tamatumanilu anguniagassaqaqaagut, taamaattumillu Kalaallit Nunaata siulittaasuutitaqalernissaa qilanaaraarput Savalimmiullu 2022-mi siulittaasuutitaqarsimanerannut qutsavigalugit,” Múte Bourup Egede oqarpoq.

Pilersaarutit malillugit nunanut allanut, sillimaniarnermut illersornissamullu tunngatillugu politikkeqarnermi attaveqaatitut ataatsimiititaliaq ukiumoortumik ataatsimiissaaq maani Kalaallit Nunaanni. Sammineqartussat ilaatigut tassaassapput, Savalimmiut Kalaallit Nunaatalu aalisarneq pillugu suliniaqatigiiffinnut namminneq ilaasortaanissaannut periarfissat, aammalu kunngeqarfiup USA-llu akornanni periusissiorneq.

Attaveqarfissaq, Naalakkersuisut siulittaasuannut allatsi Niels Dorph, mail: ndor@nanoq.gl imaluunniit oqarasuaat +299 34 56 61.