AtuartigukSapaatip akunnerani 2-mi pissaaq: Siunissami Ilaqutariit pillugit isumasioqatigiinneq
Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen, isumasioqatigiissitsiniarpoq. Tassani siunissami ilaqutariit toqqissisimasut, eqeersimaartut asannittullu anguniarnerini ataatsimoorussanik sammivilimmik pilersitsinissaq anguniarneqarpoq.
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Ukioq nutaaq isumaginninnikkut suliaqartut pingaarutillit isumasioqatigiinnerannik aallartissaaq. Isumasioqatigiinnerup nalaani “Siunissami Ilaqutariit – toqqissisimasut, eqeersimaartut aamma asannittut” oqallisigineqarneq ajortut aallartinneqassapput, soorlu assersuutigalugit nakuusertarneq, imminut toquttarneq angerlarsimaffiullu avataanut inissiisarneq.
Isumasioqatigiinnerup siunertarivaa qitiusumik sullissisartut tamarmik – kommuniniit politikerinit namminerlu piumassuseq malillugu suliniaqatigiiffinnut – suliaqarfiit assigiinngitsut akornanni suleqatigiinnerisa patajaallisarneqarnissaa assigiimmillu siunissamut takorluuinermik isummernissap nassaarineqarnissaa.
- Ilaqutariit inuiaqatigiinni tunngaviliisuupput. Ilaqutariit angisuujugaluarunik, ilaqutariit ilaqutariissiariilersuugaluarunik imaluunniit angajoqqaat kisimiittuugaluarunik, taava ilaqutariit katersuuffiusarput isumaginninnikkullu pingaaruteqarluni. Tassani ulluni nuanninngitsuni nuannersunilu imminnut akisussaaqatigiittarput. Arlaannut atassuteqarnissaq ingammik ilaqutariinnut pingaaruteqarpoq. Ilaqutariit ullutsinni inuiaqatigiinni unammilligassaqaqaat, ilaqutariit pingaaruteqarlutik siunissami ataatsimoorfissanngortinnissaannut aqqutissiuutissallugit ikiussavagut, taama oqarpoq Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen.
Peqataalluartoqassaaq
Isumasioqatigiinnermi 100-t tungaannut peqataasoqassaaq, ilaatigut kommunini politikerit, nuna tamakkerlugu politikerit, kommunini qitiusumik suleqataasut, politiit, UNICEF, oqaaseqartartut, ilisimatusartut namminnerlu piumassutsiminnik suliniaqatigiiffinneersut peqataassallutik. Tamanna Meeqqanut, Inuusuttunut, Ilaqutariinnut Peqqissutsimullu Naalakkersuisumut nuannaarutaavoq:
- Inuiaqatigiinni pitsaasumik ineriartortitsinissaq qulakkeerumallugu, kivitseqataanissamut sulerusussuseq annertusoq matumani ersersinneqarpoq, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen, oqarpoq.
Isumasioqatigiinneq “Siunissami Ilaqutariit – toqqissisimasut, eqeersimaartut aamma asannittut” Hotel Hans Egedemi januaarip 9-aniit 11-ata tungaanut pisussatut pilersaarutigineqarpoq.
Attavissaq
Sukumiisumik paasisaqarusukkuit naalakkersuisup allattaa Naja Lynge Petersen e-mailikkut nalp@nanoq.gl imaluunniit oqarasuaatikkut: +299 346641 attavigiuk.