AtuartigukQaleralinnut aqutsinermut pilersaarut akuerineqarpoq
Nassiussisuuvoq: Aalisarnermut Piniarnermullu Naalakkersuisoqarfik
Tunup avataani qaleralinniarnermi aqutsinermut pilersaarut akuerineqarpoq
Aalisarnermut Piniarnermullu Naalakkersuisoqarfik Aalisarnermut Siunnersuisoqatigiit aamma aalisarnermik inuussutissarsiuteqartut 2022-mi suleqatigalugit sulissuteqarpoq Tunup avataani qaleralinniarnermi aqutsinermut pilersaarusiortoqassasoq.
Pilersaarut taanna Naalakkersuisut januaarip aallaqqaataani 2023-mi atulersussatut akuersissutigeqqammerpaat.
Aqutsinermut pilersaarut aalisarnermut allannguuteqagaassanngilaq, aqutsiveqarfiit allanngortinneqassanngimmata, taamaattoq aalisarneq siunissami piujuaannartuutinnissaa qulakkeerniarlugu maleruagassaqarpoq.
Tunumi aalisarnermi allannguutigineqarnerpaasussaq tassaavoq sinerissap qanittuani qalerallit aalajangersimasumik pisarineqarsinnaasut qulakkeerneqarnerat. Allannguutigineqartoq aqutsinermut pilersaarummut ilanngunneqarpoq, tamaani qaleraleqatigiit assigiimmata, avataani sinerissallu qanittuani.
Taamaalilluni piujuaannartitsisumik aalisarneq qulakkeerneqassaaq, pisassatut siunnersuutit naapertorneqarlutik.
Neriuutaavoq avataani qaleralinniarneq piujuaannartitsineq tunngavigalugu aalisarnertut ilisarnaaserlugu siunissami allagartalerneqartassasoq, soorlu kitaata avataani qaleralinniarnertut. Aqutsinermut pilersaarut taama ittumik allagartalerlugu alloriarnertut siulliuvoq.
Aqutsinermut pilersaarut Naalakkersuisut.gl-imi aaneqarsinnaavoq, Aalisarnermut Piniarnermullu Naalakkersuisoqarfiup nittartagaani. Uani aaneqarsinnaalluni
Sukumiinerusumik paasisaqarusukkuit immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl