AtuartigukAalisartut Piniartullu nunatta avannaani kangianilu
Nassiussisuuvoq: Naalakkersuisut Siulittaasuata Naalakkersuisoqarfia
Kingullertigut aalisartut piniartullu nunatta avannaani kangianilu inuutissarsiutiminnik silamik peqquteqartumik ingerlatsisinnaannginnerat annertuumik nutaarsiassatigut oqallittarfinnilu oqallisigineqarpoq.
Oqallinnermi isummersuutit ilaatigut sakkortuut anninneqarput tamannalu sammisap ilungersunartuunera eqqarsaatigalugu tupinnanngilaq. Naalakkersuisuniit pissutsit malinnaavigaagut taamatullu aaqqiissutaasinnaasunik ujartuineq kommunit peqatigalugit ingerlanneqarluni.
Naalakkersuisuni ilaasortatat sulinerat Naalakkersuisuni Siulittaasuattut tatigilluinnarpara aammalu naatsorsuutigaara inatsisit iluini ilungersorlutik periarfissanik qulaajaaqataallutik ingerlatsisut. Taamaattumik Naalakkersuisuniit piffissami aggersumi oqilisaataasinnaasunik aaqqiissutissanik nassaartoqarsinnaassasoq neriutigaarput.
Maannakkorpiaq pisut aaqqiivigisinnaanissaat annertuumik sulissutigineqarpoq taamaattorli aamma siunissami silap pissusaata allanngoriartorneranut atatillugu siunissami patajaannerusumik iliuuserisinnaasassatsinnik Naalakkersuisuniit sulissutigaarput.
Naalakkersuisooqatigiinni suleqatigiilluarnitsigut periarfissanik qulaajaanitta kinguneqarluarnissaa neriutigaara taamatullu siunissamut tunngatillugu aaqqiissutissanik suliaqarnissarput pimoorullugu.
Inussiarnersumik inuulluaqqusillunga
Múte B. Egede
Naalakkersuisut Siulittaasuat