AtuartigukMeeqqat inuusuttullu tarnimikkut nappaatillit immikkoortortaqarfiat pitsanngorsarneqassaaq
Nassiussisuuvoq: Peqqissutsimut Naalakkersuisoqarfik
Meeqqat inuusuttullu tarnimikkut nappaatilllit atugarisaat pitsanngorsarniarlugit aningaasanut inatsimmi ukiumut 3 million koruunit immikkoortinneqarput.
”Meerarpassuit inuusuttorpassuillu tarnikkut ajunngitsumik inissisimapput, kisianni aamma meeqqat inuusuttullu ilaat taamaanngillat. Meerartagut inuusuttortavullu misissorneqarniassammata aamma eqqortumik ikiorneqarlutillu tapersersorneqarniassammata suliniuteqarfigissavagut," Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen oqarpoq.
Tarnikkut napparsimasut immikkoortortaqarfianni meeqqat inuusuttullu 150-it missaanniittut isumagineqarput, ukiumullu 125-t nutaat innersuuneqartarumaartut naatsorsuutigineqarpoq. Meeqqat inuusuttullu tarnikkut napparsimasut unitsinneqanngikkaluarlutik misissorneqarnissaat qaammatini qulingiluani missaanni utaqqisinneqartarput. Tamatuma saniatigut meeqqat inuusuttullu tarnikkut nappaammik ajornartorsiutillit sulilu peqqinnissaqarfimmut saaffiginnissimanngitsut taamaasillutillu tarnikkut nappaatilinnik sullissisunit suliarineqalersimanngitsut imaluunniit suliarineqalernissaminnut utaqqisut kisitsisaatigineqanngillat.
"Inuusuttut taakku attaveqarfiginissaat pingaaruteqarpoq, taamaammat ornigulluni suliaqarneq aallartinneqassaaq, pineqartut misissortinneqarsinnaaniassapput katsorsartinnissamillu neqeroorfigineqarsinnaanngorlutik", Mimi Karlsen oqarpoq.
Paasisaqarnerorusukkuit immikkoortortaqarfimmi pisortaq Aka Olesen attavigiuk e-mailikkut: akol@nanoq.gl imaluunniit oqarasuaatikkut: +299 346669